ԱՄՆ Ներկայացուցիչների պալատն ընդունել է Հայոց ցեղասպանության ճանաչման բանաձևը

ԱՄՆ Ներկայացուցիչների պալատը հոկտեմբերի 29-ին տեղի ունեցած քվեարկության արդյունքում ընդունեց Հայոց ցեղասպանության ճանաչման բանաձեւը։

405 կոնգրեսականներ կողմ են քվեարկել բանաձեւի ընդունմանը, դեմ են եղել 11-ը։

«ԱՄՆ Ներկայացուցիչների պալատը քվեարկեց Հայոց ցեղասպանության ճանաչման մասին բանաձեւի օգտին։ Սա պատմական իրադարձություն է մեր հանրության համար»,- Twitter-ի իր էջում գրել է Հայ դատի հանձնախմբի արեւմտյան թեւը։

Նշենք, որ բանաձեւը, որի հեղինակներն են Ադամ Շիֆը եւ Հուս Բիլիրակիսը, ներկայացվել էր այս տարվա ապրիլին եւ ուղղված է 1915թ․ Օսմանյան կայսրության կողմից իրականացված Հայոց ցեղասպանությունից հրաժարվելու մերժմանը, ԱՄՆ կառավարության կողմից Հայոց ցեղասպանության ճանաչմանը եւ հիշատակմանը, ցեղասպանության մասին իրազեկվածության կարեւորությանը՝ հետագայում նման հանցանքների կանխման առումով։

Սենատորներ Ռոբերտ Մենենդեսը եւ Թեդ Քրուզը գլխավորել են Սենատում բանաձեւի տարբերակը։

Հիշեցնենք, մինչ այդ Operativ լրատվականը հաղորդել էր, որ ԱՄՆ Ներկայացուցիչների պալատն ընդունել է Հայոց ցեղասպանության ճանաչման բանաձևն օրակարգում ներառելու հարցը:

Կոնգրեսականներից 223-ն ընդունմանը կողմ է քվեարկել, 191-ը՝ դեմ:

Նշենք, որ սկսվել էին բանավեճեր, և Կոնգրեսը 1 ժամ ուներ Հայոց ցեղասպանության բանաձևի քննարկման համար: