Doing Business 2020 զեկույցը որևէ անճշտություն չի պարունակում. Համաշխարհային բանկը՝ Ջավադյանի հայտարարության մասին

Համաշխարհային բանկի Doing Business 2020 զեկույցը որեւէ անճշտություն չի պարունակում: «Ամերիկայի ձայն»-ի հետ զրույցում ասել է Համաշխարհային բանկի մասնավոր ոլորտի զարգացման ավագ մասնագետ Վալենտինա Սայնթայնը` մեկնաբանելով ՀՀ Կենտրոնական բանկի նախագահ Արթուր Ջավադյանի հայտարարությունը, թե զեկույցի վարկանիշային աղյուսակում որոշակի սխալ է թույլ տրվել, որը շտկվելու դեպքում վարկանիշային աղյուսակում Հայաստանը կզբաղեցնի 37-րդ տեղը՝ ներկայիս 47-րդի փոխարեն:

«Մեր տեսանկյունից որեւէ անճշտություն կամ սխալ Հայաստանի մասով չկա: Այս տարի մենք պարզապես փոքր-ինչ վերանայեցինք եւ վերափոխեցինք փոքր չափաբաժին ունեցող ներդրումների պաշտպանվածության ցուցանիշների գնահատականը: Որեւէ նոր տարր չենք ավելացրել, պարզապես շտկումներ ենք մտցրել»,- ասել է նա:

Նա նշել է, որ ընդհանուր առմամբ Հայաստանը հաջող է գործում, որոշ ոլորտներում առկա հարցերը կապված են հիմնականում օրենսդրական փոփոխությունների հետ, եւ այդ փոփոխությունները զգալու համար ժամանակ է անհրաժեշտ:

Նշենք, որ Հայաստանի հարևաններ Վրասատանը, Թուրքիան եւ Ադրբեջանը ավելի լավ վիճակում են, իսկ Իրանը զբաղեցնում է 127-րդ հորիզոնականը:

Հիշեցնենք, Operativ լրատվականը ավելի վաղ հաղորդել էր, որ Doing Business վարկանիշում Հայաստանն իջել է 6 դիրքով :

Կառավարության նիստին վարչապետ Նիկոլ Փաշինյանը Էկոնոմիկայի նախարարությունից պարզաբանում էր պահանջել, թե ինչու է Doing Business-2020 զեկույցում Հայաստանը հետընթաց ապրել:

Ծավալված քննարկման վերջում ԿԲ նախագահ Արթուր Ջավադյանը հայտարարել էր, թե պարզապես տեխնիկական սխալ է եղել, որը շտկվելու դեպքում Հայաստանը կլինի 37–րդ տեղում։