ՀՀ ոստիկանության անձնագրային և վիզաների վարչության ու տարածքային անձնագրային ծառայությունների 62 մասնաշենքերում մանրը վերադարձնող սարքեր և վճարային տերմինալներ կտեղադրվեն

Կառավարությունն իր այսօրվա՝ սեպտեմբերի 5-ի նիստում որոշեց ՀՀ ոստիկանության անձնագրային և վիզաների վարչության ու տարածքային անձնագրային ծառայությունների 62 մասնաշենքերում ընդհանուր 32.5 քմ մակերեսով տարածքները 6 տարի ժամկետով անհատույց օգտագործման իրավունքով տրամադրել «ԹԵԼ-ՍԵԼ» ընկերությանը՝ այնտեղ մանրը վերադարձնող սարքեր և վճարային տերմինալներ (յուրաքանչյուրը 0.5 քառ. մետր մակերեսով) տեղադրելու նպատակով:

Որոշման մեջ նշվում է, որ տարածքն անհատույց օգտագործման նպատակով տրամադրվում է՝ պայմանով, որ մանրը վերադարձնող սարքերից եւ վճարային տերմինալներից բացի ընկերությունը պարտավորվում է անձնագրային եւ վիզաների վարչությունում եւ առավել ծանրաբեռնված տարածքային անձնագրային ծառայություններում անվճար տեղադրել անկանխիկ գանձման ՊՈՍ տերմինալներ եւ առնվազն հերթերի կառավարման 35 համակարգեր՝ ապահովելով դրանց տեխնիկական սպասարկումը:

Ըստ այդմ, բոլոր անձնագրային ստորաբաժանումները կհամալրվեն մանրը վերադարձնող տերմինալներով:

Միաժամանակ կկատարվի եւս մեկ ծրագիր՝ առանց պետական բյուջեի վրա լրացուցիչ ծանրաբեռնվածության կտեղադրվեն հերթերը կանոնակարգող թվով 35 սարքավորումներ եւ ՊՈՍ տերմինալներ (ընդհանուր արժեքը 59 մլն.),

անձնագրային գործողությունների համար քաղաքացիներից կգանձվի ֆիքսված միջնորդավճար՝ 100 դրամ (ներկայումս, առավելագույնը 300 դրամ է)։