Կաթված ունեցող 212 պացիենտ արդեն բուժում է ստացել պետպատվերի շրջանակում, նրանցից 182-ն ապաքինվել է. նախարար

Օգոստոսի 27-ի տվյալներով՝ կաթված ունեցող 212 պացիենտ իշեմիկ կաթվածի բուժման բուժսպասարկումներ է ստացել պետպատվերի շրջանակում, ընդ որում՝ այդ պացիենտների 45 տոկոսը երկրի մարզերից էր։ Այս մասին տեղեկացրել է Հայաստանի առողջապահության նախարար Արսեն Թորոսյանը վարչապետ Նիկոլ Փաշինյանի հետ հանդիպման ընթացքում։

Նրա խոսքով՝ 180 պացիենտ վերադարձել է նորմալ կյանքի, իսկ 30-ին, ցավոք, փրկել չի հաջողվել։ Սակայն առանց այդ ծրագրի պացիենտների մեծ մասը, ամենայն հավանականությամբ, ողջ չէր մնա, քանի որ կաթվածը շատ կարեւոր է սկսել բուժել որքան հնարավոր է շուտ, այդ դեպքում հաջողության հնարավորությունները բավական բարձր կլինեն։

Ծրագրի շրջանակում կաթված ունեցող պացիենտին հասցնում են երկու կլինիկաներից մեկը («Էրեբունի» եւ «Հերացի»), որտեղ նրանց կարող են անհրաժեշտ օգնություն ցուցաբերել։ Առավելագույն կարճ ժամանակաընթացքում նրանք անհրաժեշտ հետազոտություն են անցնում, ինչից հետո կա բուժման 2 ճանապարհ. սկզբում պացիենտին ներարկում են հատուկ դեղամիջոց, որը պետք է ցրի թրոմբը եւ վերականգնի ուղեղի արյան շրջանառությունը։ Եթե դեղամիջոցը արդյունավետ չի լինում, կարելի է վիրահատել եւ անոթից հեռացնել թրոմբը։ Եթե այս ամենն արվի բավականաչափ արագ, կան լավ շանսեր, որ պացիենտը ոչ միայն ողջ կմնա, այլեւ կապաքինվի եւ հաշմանդամություն չի ունենա։

Նախարարը նաեւ նշել է, որ 212 պացիենտի համար պետբյուջեից ծախսվել է 350 մլն դրամ, ավելի քան 1,5 մլն մեկ մարդու համար։ Ծրագրի ընդհանուր բյուջեն տարեկան մոտ 1 մլրդ դրամ է։

Նախարարի խոսքով՝ մոտ ապագայում նախատեսվում է սկսել ծրագրի իրականացումը նաեւ «Աստղիկ» ԲԿ-ում, ինչպես նաեւ ծրագրում ներգրավել նաեւ մարզային հիվանդանոցները. թրոմբոէկտոմիա կատարել այդ հիվանդանոցներում հազիվ թե կարողանան, բայց կարելի կլինի գոնե ներարկել թրոմբը ցրող դեղամիջոցը, մինչեւ որ պացիենտին կհասցնեն Երեւան։