Ամուլսարի հարցում ժողովուրդն ընդվզելու է և Նիկոլ Փաշինյանի հրամանով ոստիկանները ուժ են կիրառելու. Ազգային համաձայնություն» կուսակցության նախագահ Արամ Հարությունյան

Ամուլսարի հարցը ՀՀ վարչապետ Նիկոլ Փաշինյանի համար պարադոքսալ հարց է։ Այս մասին այսօր՝ օգոստոսի 29-ին, լրագրողների հետ հանդիպմանն ասաց «Ազգային համաձայնություն» կուսակցության նախագահ Արամ Հարությունյանը։

«Ինչպես ցանկացած տեսության մեջ գոյություն ունեն պարադոքսներ, օրինակ կա սուտասանի պարադոքս, մեկն ասում է՝ ես սուտասան եմ, հիմա եթե ինքը սուտասան է, ապա ինքը սուտասան չէ, հասկանում եք, որ պարադոք է։ Հիմա Նիկոլ Փաշինյանի համար Ամուլսարը այս պարադոքսալ հարցերից է, եթե բացում է հանքը, հեղափոխության գաղափարներին է հակասում, մյուս կողմից հեղափոխության պատվիրատուները, որոնք հանդես են գալիս որպես շահառու եւ չեն թողելու, որ հանքը չաշխատի»,–նշեց նա։

Արամ Հարությունյանը շեշտեց՝ Նիկոլ Փաշինյանը շատ վատ իրավիճակում է հայտնվել. «Բայց դրա մեղավորն ինքն է, քանի որ ուրիշների ձեռքով եկել է իշխանության։ Հանքը հնարավոր չի աշխատի, Ամուլսարի դեպքն Իջեւանի դեպքերից չէ, որ, օրինակ, մեղադրեն մարդկանց, թե գողություն են անում։ Այստեղ լուրջ շահեր կան, հայ մարդուն կարող ես 10 հազար դրամ տալ, ասել գնա ընտրի, ինքը հասկանում է, որ 10 հազարը չվերցնի, շատ բան չի փոխվելու, բայց երբ կպնում ես թոռանը, առողջությանը, կարող է ագրեսիվ դառնալ, բացի այդ այդտեղ բիզնես շահեր կան՝ հյուրանոցներ կան, տներ են վարձով տալիս։ Ես համոզված եմ, որ Նիկոլ Փաշինյանն ուժ է կիրառելու, վախկոտ մարդիկ վախից կրակում են։ Եթե մի քանի հազար մարդ հավաքվի Կառավարության առջեւ եւ նրա հրաժարականը պահանջի, ապա մենք չգիտենք, թե ինչ ռեակցիա կտա։ Նա ադեկվատ չէ, եւ համոզված եմ, որ ի տարբերություն նախորդ նախագահների՝ նման իրավիճակում նա իրեն չի պատկերացնում»։

Նրա համոզմամբ՝ Ամուլսարի հարցում իրավիճակը սրվելու է, ծեծելու ու ջարդելու են իրար։

ՀՀ ֆինանսների նախկին նախարար, Պետական եկամուտների կոմիտեի նախկին նախագահ Գագիկ Խաչատրյանի ձերբակալությանը եւ Արթուր Ասատրյանին՝ Դոն Պիպոյին բերման ենթարկելուն առնչությամբ Արամ Հարությունյանը ասաց. «Ոստիկանապետ Վալերի Օսիպյանը «դրուժինիկի» մակարդակից այն կողմ դեռ չի հասել, ուստի դեպքերը, որոնք տեղի են ունենում ոստիկանությունում, բնական են, երբ գոմիկները մտնում ծեծում են ոստիկանության շենքում, արձագանք չկա, «Սասնա ծռերի» դատավարությանը ոստիկանապետին լակոտ են անվանում, պատասխան չկա»։

Նա նկարծիք հայտնեց նաեւ, որ ոստիկանները Նիկոլ Փաշինյանի հրամանով պետք է ուժ կիրառեն. «Քանի որ Օսիպյանը իր տեղում չէ, բնականաբար, ոստիկանները Նիկոլ Փաշինյանի հրամանով պետք է ուժ կիրառեն։ Բայց բոլոր ուժայինների ղեկավարներին ասեմ, որ Նիկոլ Փաշինյանը Թութանհամոնը չէ, որ իրենց նրա հետ դնեն գերեզման։ Նրա գնալուց հետո նրանց երեխաներն այստեղ են ապրելու, երեխաները պատասխան են տալու։ Դիտարկելով Նիկոլ Փաշինյանի պահվածքը՝ կանխատեսում եմ, որ շատ վատ բաներ կլինի՝ եթե ժողովուրդն ընդվզի, իսկ ժողովուրդն ընդվզելու է։ Այսօր մենք իրավունք չունենք երկիրը թողնելու ոչ ադեկվատ մարդու հույսին, մանավանդ որ երկիրը բազում մարտահրավերների առաջ է կանգնած»։