Հայաստանում բնակչության շրջանում գրանցվում է հեպատիտ В-ի նվազում

1999 թվականից Հայաստանում կատարվում է պատվաստում հեպատիտ В-ի դեմ։ Ինչպես տեղեկացրել է Հայաստանի առողջապահության նախարարության իմունականխարգելման ծրագրի ղեկավար Գայանե Սահակյանը հուլիսի 26-ի մամուլի ասուլիսում, նման ռազմավարությունն արդեն դրական արդյունքներ է տվել։

Այսպես, եթե 1999-ին Հայաստանում հայտնաբերվել է սուր վիրուսային հեպատիտ В-ի 92 դեպք, ապա վերջին 10 տարում գրանցվում են միայն եզակի դեպքեր։ Սահակյանը ուշադրություն է հրավիրել այն բանին, որ Հայաստանում նորածինների 97 տոկոսը ստանում է այս պատվաստումը, ինչի շնորհիվ երեխաների շրջանում հեպատիտ В-ի սուր ձեւով հիվանդացությունը կտրուկ նվազել է։ Բացի այդ, վերջին երկու տարում այդ պատվաստանյութը ստանում են նաեւ այն անձինք, որոնք մտնում են ռիսկի խմբի մեջ։ Նրանք, մասնավորապես, բուժաշխատողներն են, որոնք շփում են ունենում պոտենցիալ վարակված հեղուկների հետ; պացիենտները, որոնք դիալիզ կամ արյան փոխներարկում են ստանում; շաքարային դիաբետով հիվանդները։

Վիրուսային հեպատիտ В-ով հիվանդացությունը հանրապետության բնակչության շրջանում մոտ 2 տոկոս է, իսկ հեպատիտ С-ով հիվանդացությունը՝ 3-5 տոկոս։ Սահակյանը նշել է, որ հաջողվել է կայունացնել նաեւ իրավիճակը հեպատիտ А-ի հիվանդացության պարագայում. եթե առաջ տեղի էին ունենում այս հիվանդության բռնկումներ, ապա այսօր խոսքը եզակի դեպքերի մասին է։

Փորձագետը տեղեկացրել է, որ հեպատիտ С-ի պատվաստանյութեր գոյություն չունեն, ինչի առնչությամբ աշխարհում դրա տարածվածության խնդիրը չի կորցնում հրատապությունը։