Եթե ամեն ինչ հաջող գնա, այսօր ժամը 17.00-ին, ՀՀ քաղաքացիները Հուրգադայից կվերադառնան Հայաստան. Մելքումյան
Եգիպտոսում ՀՀ դեսպանությունը գործադրում է բոլոր ջանքերը, որպեսզի այսօր Հուրգադայից Երեւան չվերթը կայանա։ Այս մասին այսօր՝ հուլիսի 26-ին, News.am-ին հայտնել է Եգիպտոսում ՀՀ դեսպանության հյուպատոս Ռաֆայել Մովսեսյանը։ Նրա խոսքով՝ դեսպանությունը մշտապես կապի մեջ է այնտեղ գտնվող մարդկանց հետ։ «Մենք 24 ժամ կապի մեջ ենք քաղաքացիների հետ։ Կան դեպքեր, երբ մարդիկ չեն կարողանում կապվել իրենց հարազատների հետ և մենք օգնում ենք։ Մի քանի ժամից մենք հանդես կգանք պաշտոնական հայտարարությամբ և կտեղեկացնենք չվերթի մասին»,- ասաց Մովսեսյանը։
Հարցին, թե այս օրերի ընթացքում օդանավակայանում քանի՞ քաղաքացի է մնացել, ի՞նչ կարգավիճակում են և արդյոք լուծվե՞լ է նրանց սննդի հարցը, Մովսեսյանը պատասխանեց․ «Ես հիմա չեմ ուզում դետալների մեջ մտնել, այս պահին ավելի բան չեմ կարող ասել»։
Իր հերթին, ԱԺ ԲՀԿ խմբակցության պատգամավոր Միքայել Մելքումյանը News.am-ի հետ զրույցում նշել է, որ ինքը այս հարցերի վերաբերյալ զրուցել է ԱԳՆ գլխավոր քարտուղար Վահագն Մելիքյանի, նաև Եգիպտոսում ՀՀ հյուպատոս Ռաֆայել Մովսիսյանի հետ և վերջինս հայտնել է, որ եթե ամեն ինչ հաջող գնա, այսօր, Եգիպտոսի ժամանակով 15.00-ին (Երևանի ժամանակով 17.00), Հուրգադայի օդանավակայանում մնացած ՀՀ քաղաքացիները կվերադառնան Հայաստան:
Նա տեղեկացրել է, որ այս պահին իրենք բանակցում են համապատասխան ավիափոխադրողի հետ, որը պետք է ՀՀ քաղաքացիներին հասցնի Երևան. «Այս պահին փոխադրողի հետ պետք է համաձայնագիրը ստորագրվի: Այս առումով խնդիրը հանգուցալուծում է ստանում: Մնացածը, որոնք հուլիսի 29-ին պետք է վերադառնան, նրանց ուղղությամբ ևս աշխատանքներ կկատարվեն, որ բարեհաջող հասնեն Հայաստան: Մեր հանձնաժողովը ևս իր ուշադրության կենտրոնում կպահի խնդիրը»,-ընդգծեց Մելքումյանը:
Հիշեցնենք, երեկ Operativ լրատվականը հաղորդել էր, որ Հուրգադա-Երևան չվերթի չեղարկման պատճառով ժամը 13:40 -ի դրությամբ Հուրգադայում չի կարողանում տուն վերադառնալ մոտ հարյուր ՀՀ քաղաքացի:
Հիշեցնենք նաև, որ հուլիսի 23–ին էլ չեղարկվել էին Երևան– Շարմ Էլ Շեյխ և հակառակ ուղղությամբ չվերթները։
Հայկական տուրօպերատորը չի վճարել չվերթի գումարը, հայտնել էր Եգիպտոսում ՀՀ դեսպանության հյուպատոս Ռաֆայել Մովսեսյանը։
«Էյ էնդ Ար» տուրիստական ընկերության դիմաց բողոքի ակցիա էր Հուրգադա-Երևան չվերթի չեղարկման կապակցությամբ :