Մայրաքաղաքի աղբահանության հարցը գրեթե լուծված կլինի սեպտեմբերին. ավագանու անդամ
Սեպտեմբերին մայրաքաղաքի աղբահանության հարցը գրեթե լուծված կլինի: News.am-ի թղթակցի հետ զրույցում այս մասին ասաց «Իմ քայլը» իշխող դաշինքից Երևանի ավագնու անդամ Գայանե Մելքոմյանը:
Նրա խոսքով՝ երկու ամիս առաջ ստեղծվել էր համայնքային պետական ոչ առևտրային կազմակերպություն, որը նաև զբաղվում է աղբահանությամբ:
«Ներկա պահին Համայնքային պետական ոչ առևտրային կազմակերպությունն ունի 5 աղբատար: 24 մեքենաներից, որոնք պետք է Երևան տեղափոխվեն, 2-ն արդեն Երևանում են և մի քանի օրից արդեն կօգտագործվեն:
Ակնկալում ենք, որ այս ամսվա ընթացքում բոլոր 24 աղբատարները կլինեն քաղաքում: Բացի այդ երեկ մենք ստացել ենք նաև 400 աղբարկղեր», - նշեց նա:
Գայանե Մելքոմյանը հավելեց, որ այսօր ՊՈԱԿ-ն, ըստ էության երկրորդ օպերատորի դեր է կատարում, սակայն չի բացառվում, որ կներդրվի նաև նոր մասնավոր օպերատոր:
Հիշեցնենք, որ արդեն երկար ժամանակ է քաղաքապետարանը չի կարողանում կարգավորել իր աշխատանքը «Սանիտեքի՝ աղբահանության օպերատորի հետ: Երևանը բառացիորեն թաղված է աղբի մեջ, ընդ որում քաղաքում բոլոր խնդիրները սկսվել են իշխանափոխությունից հետո՝ անցյալ տարվա հոկտեմբերին:
Հիշեցնենք նաև, որ նախկին ավագանուն անդամ Սոնա Աղեկյանը երկարատև ժամանակ է, ամենատարբեր բողոքի ակցիաներ է անցկացնում՝ աղբ նետելով քաղաքապետարանի առաջ, փուչիկների վրա տեղադրելով Հայկ Մարությանի լուսանկարը և այլն, փորձելով ևս մեկ անգամ բարձրաձայնել բնակիչների բողոքի ալիքը առ այդ ամենաթողությունը: