Ջուլֆալակյանների կողմից ծեծի ենթարկվելու մասին ահազանգողը «Ավենյու Դե Փարիզի» համասեփականատերն է

ԱԺ պատգամավոր Արսեն Ջուլֆալակյանի և նրա հոր՝ օլիմպիական չեմպիոն Լևոն Ջուլֆալակյանի դեմ հաղորդում ներկայացրած Սերգեյ Մխիթարյանը Երևանի Աբովյան 23 հասցեում գործող «Ավենյու Դե Փարիզ» ՍՊԸ– ի համասեփականատերն է։ Սրճարանից հաստատեցին տեղեկությունը՝ հրաժարվելով նշել սեփականատիրոջ գտնվելու վայրը։

Նշենք, որ այսօր Shamshyan.com–ը գրել էր, որ մայիսի 5–ին՝ ժամը 15։00-ի սահմաններում, Պուշկինի փողոցի 60 շենքի ստորգետնյա ավտոկայանատեղիի մուտքի մոտ ինչ-որ խնդիրների շուրջ վիճաբանություն է տեղի ունեցել Ս. Մխիթարյանի և Երևան քաղաքի բնակիչներ՝ 32-ամյա Արսեն Ջուլֆալակյանի և 55-ամյա Լևոն Ջուլֆալակյանի միջև, որի ժամանակ, ըստ Ս. Մխիթարյանի հայտարարության, վերջիններս ձեռքերով և ոտքերով հարվածներ են հասցրել իրեն։

Ոստիկանությունից հայտնեցին, որ մայիսի 5–ին ժամը 17։40 հիվանդանոցից հաղորդում է ստացվել, որ շտապօգնության խումբը Աբովյան–Թումանյան փողոցների խաչմերուկում գտնվող շենքի մոտից ծեծված վիճակում բուժօգնության է տեղափոխել մի քաղաքացի, ով հայտնել է, որ նշված շենքի մոտ իրեն ծեծի են ենթարկել։ «Էրեբունի» ԲԿ–ից էլ տեղեկացրեց, որ Մխիթարյանը բժշկական կենտրոնում բուժօգնություն ստանալուց հետո դուրս է գրվել հիվանդանոցից։

Ավելի վաղ լրագրողների հետ զրույցում Արսեն Ջուլֆալակյանը հերքել էր տեղեկությունը՝ նշելով, որ Սերգեյ Մխիթարյանը իրենց հետ համատեղ սրճարանի համասեփականատեր է, վերջինիս հետ հանդիպել են գործնական հարցերի քննարկման համար, սակայն հանդիպումն անցել է «սովորականից մի փոքր լարված մթնոլորտում»։ Զրույցի ընթացքում վատ է իրան զգացել (ավելի ուշ բուժքույրն ասեց ճնշումը բարձրացել էր...), կանչել ենք շտապ օգնություն և տեղափոխել հիվանդանոց»,–գրել էր նա՝ նշելով, որ մնացածի մասին «հավանաբար կասի Սերգեյը»։

Սերգեյ Մխիթարյանի հետ առայժմ կապ հաստատել չհաջողվեց։