Boeing 737-ը 136 ուղևորով ընկել է գետը ամերիկյան Ֆլորիդա նահանգում

Առեւտրային Boeing 737 ինքնաթիռը՝ 136 ուղեւորով, Ֆլորիդայի նահանգի Ջեքսոնվիլ քաղաքում ընկել է Սենթ Ջոնս գետը, տեղեկացնում է Reuters-ը՝ հղում կատարելով Ջեքսոնվիլի ռազմածովային օդանավակայանին ներկայացուցչին։

Նշվում է, որ զոհերի մասին տեղեկություն չկա։

Ինչպես տեղեկացրել են օդանավակայանում, ինքնաթիռը, որը դուրս էր եկել Գուանտանամոյի ծոցի ռազմածովային կայանից, ընկել է գետը, երբ թռիչքը մոտենում էր ավարտին, տեղի ժամանակով մոտավորապես ժամը 21.40-ին։

Ջեքսոնվիլի քաղաքապետը Թվիթերում գրել է, որ բոլոր նրանք, ովքեր գտնվել են ինքնաթիռում, «ողջ են եւ հաշվարկվել են», օդանավի անձնակազմն աշխատում է ջրում վառելիքը վերահսկելու ուղղությամբ։

Նա նաեւ տեղադրել է գետում ինքնաթիռի լուսանկարը՝ Miami Air International ընկերության լոգոտիպով։