ՀՀ գլխավոր դատախազն աննախադեպ դատավարություն է խոստանում. Երեք նախագահները՝ տարբեր կարգավիճակներում
Հայաստանի գլխավոր դատախազ Արթուր Դավթյանը հստակ պատասխան է տալիս այն հարցին, թե արդյոք «չորսի գործով» դատավարության ժամանակ մեղադրանքը կպաշտպանի՞, որը 2008 թվականի մարտի 1-ի իրադարձությունների գործից առանձին վարույթ անջատված մասն է:
Հիշեցնենք, որ գործով անցնում են նախկին նախագահ Ռոբերտ Քոչարյանը, պաշտպանության նախկին նախարար Սեյրան Օհանյանը, ՀԱՊԿ նախկին գլխավոր քարտուղար Յուրի Խաչատուրովը եւ նախկին փոխվարչապետ Արմեն Գեւորգյանը:
«Դատարանում դատախազը կարող եմ լինել ես, գուցե հսկողություն իրականացնող դատախազ: Դատարանում կտեսնեք»,- ասաց դավթյանը լրագրողների հետ զրույցում:
Գլխավոր դատախազը կտրականապես համաձայն չէ երկրում քաղաքական բանտարկյալների առկայության մասին ձեւակերպմանը: «Կոնկրետ արարքներով կոնկրետ մեղադրանքներ են առաջադրված»,- հավաստեց գլխավոր դատախազը: Նա միաժամանակ հիշեցրեց, որ դատարան է ուղարկվել առանձին վարույթ անջատված մասը, իսկ գործի քննությունը շարունակվում է, համապատասխանաբար՝ կարող են լինել նոր անձինք եւ նոր որոշումներ: Նրա խոսքով՝ քննության տրամադրության տակ նոր տեղեկություններ կան, այդ թվում՝ սպանվածների վերաբերյալ, բայց տվյալներն առայժմ բավարար չեն մեղադրանք առաջադրելու համար:
Պարկուճները փոխելու մասով քրեական հետապնդումը շարունակվում է, տեղեկացրել է Դավթյանը։
Երբ լրատվամիջոցների ներկայացուցիչները հետաքրքրվել են, թե ինչու նախկին իշխանության օրոք, նույն Դավթյանի օրոք քննությունը դոփում էր տեղում, իսկ հիմա թափ է հավաքել, գլխավոր դատախազը խորհուրդ է տվել կարդալ գլխավոր դատախազության գործառույթների մասին օրենքը. այն ղեկավարում եւ ուղղորդում է, բայց անմիջական քննություն չի վարում։ «Բայց քննության ռեսուրսները նույնպես պետք է օբյեկտիվորեն գնահատել»,- հավելել է Դավթյանը։ Նրա խոսքով՝ իրավիճակի բանալին քաղաքացիների փոխված վերաբերմունքն է։ «Մարդիկ, որոնք առաջ լռում էին, հիմա խոսում են։ Քաղաքացիները սկսել են համագործակցել քննության հետ»,- տեղեկացրեց Դավթյանը։
«Սա աննախադեպ դատ է. երեք նախագահ՝ տարբեր կարգավիճակներում, պետական եւ քաղաքական գործիչներ։ Հասարակությունը կտեսնի եւ ինքը գնահատական կտա»,- խոստացավ գլխավոր դատախազը։ Նրա խոսքով՝ նիստերի ոչ մեծ մասը կանցկացվի փակ դռների հետեւում։ Մնացած գործընթացը բաց կլինի լայն հանրության համար։