«Որսն էլ չի արգելվում, մատաղ անելն էլ, բա տակն ի՞նչ է մնում». Կենդանիների հանդեպ դաժան վերաբերմունքը կքրեականացվի՞
Կառավարությունն իր այսօրվա՝ մայիսի 2-ի նիստում քննարկեց ԲՀԿ-ական պատգամավորներ Նաիրա Զոհրաբյանի, Արման Աբովյանի, Էդուարդ Բաբայանի, Շաքե Իսայանի, Վահե Էնֆիաջյանի ներկայացրած առաջարկը Քրեական օրենսգրքում եւ «Վարչական իրավախախտումների մասին» օրենքում փոփոխություններ կատարելու մասին, որով առաջարկվում է քրեականացնել կենդանիների նկատմամբ դաժան վերաբերմունքը՝ դրա դրսեւորումների տարբեր ծանրացուցիչ հանգամանքներով:
Հիմնական զեկուցող արդարադատության նախարար Արտակ Զեյնալյանը նշեց, որ բովանդակային առումով համաձայն է առաջարկի հետ, սակայն կարծում են, որ պետք է այս խնդիրը լուծվի համապարփակ ձեւով:
«Այս պահի դրությամբ ԱԺ-ում մշակվում է նյութական իրավունքի նորմեր պարունակող օրենք եւ դրա վրա աշխատում են բնապահպանության նախարարության աշխատողները, որտեղ կսահմանվի այդ «դաժան վերաբերմունքը»: Առաջարկում ենք այդ փաթեթի շրջանակում այս փոփոխությունները կատարել»,- ասաց նա Զեյնալյանը:
Վարչապետ Նիկոլ Փաշինյանն իր հերթին նշեց, որ գաղափարի առումով լավ նախագիծ է, բայց պետք է չափանիշները հստակ լինեն, որովհետեւ խոսքը պոտենցիալ քրեական հետապնդում իրականացնելու մասին է. «Պետք է հասկանալ, որ այնպիսի իրավիճակում չկանգնենք, որ ենթադրենք մարդը իր բակում ծննդյան օրվա առիթով գառ է մորթում, չգնանք քրեական գործ հարուցենք: Չափանիշները պետք է շատ հստակ լինեն, որպեսզի աբսուրդ իրավիճակների առաջ չկանգնենք»:
Փաշինյանն առաջարկեց հեղինակների խմբի հետ աշխատել խնդրին լուծում տալու համար:
Փոխվարչապետ Մհեր Գրիգորյանը հետաքրքրվեց՝ արդյո՞ք այս նախագծով որսը արգելվում է, ինչին Փաշինյանն արձագանքեց. «Որսն էլ չի արգելվում, մատաղ անելն էլ չի արգելվում»:
Մհեր Գրիգորյանն էլ նկատեց. «Բա «տակն ի՞նչ է մնում», որ կատվին անչափահասները գլխից բռնո՞ւմ են»:
Նիկոլ Փաշինյանն ասաց. «Դաժան վերաբերմունքի բազմաթիվ օրինակներ կան: Ես, օրինակ, քրեակատարողական հիմնարկում ականատես եմ եղել, թե ոնց են կատվին գցել դետալները մշակելու դիսկի մեջ: Ինձնից մեծ ջանքեր պահանջվեցին կատվին այդտեղից փրկելու համար: Այդպիսի դաժան ենթամշակույթ կա, եւ դրա դեմ պետք է պայքարել: Սա իրականում լուրջ հարց է: Հնարավոր է, որ կենդանիների ապօրինի կռիվների կազմակերպելը այս կատեգորիայի տակ մտնի: Օրինակի համար, կենդանիներին զվարճանքի համար հրաձգարանի թիրախ են դարձնում»: Նա հավելեց, որ բազմաթիվ այլ դեպքեր էլ կան:
Վարչապետը հիշեցրեց, որ տարիներ առաջ տեսանյութ էր հայտնվել, թե ոնց էին ավանակին գցել գիշատիչ կենդանու վանդակը, եւ դրա շուրջ մեծ զվարճություն էր կազմակերպվել. «Ես հիմա չգիտեմ, թե այդ իրավակարգավորումներով դա ինչ իրավական գնահատական կունենա, բայց նկատի ունեմ, որ բազմաթիվ դեպքեր կան»:
Արտակարգ իրավիճակների նախարար Ֆելիքս Ցոլակյանն էլ հիշեցրեց, որ այդ տեսանյութում բռնությունը առյուծի նկատմամբ էր. «Եթե հիշում եք՝ բռնությունը առյուծի նկատմամբ էր: Ավանակին որ մտցրել էին, առյուծն էր խեղճացել: Ինչքան հիշում եմ՝ մի հատ էլ առյուծին խփեց ոտով»:
Վարչապետն էլ նշեց, թե այդ տեսանյութը չի նայել, միայն վերնագրերն է տեսել: «Դե երեւի առյուծն էլ ունի իրավունքներ, որոնք պետք է պաշտպանել»,- կատակեց նա:
Նախարարներից շատերը սկսեցին օրինակ բերել կենդանիների նկատմամբ բռնության դեպքեր:
«Ժողովուրդ ջան, էս ինչքան խորացաք», - կատակեց Նիկոլ Փաշինյանը: