Տուլարեմիա պատվաստանյութի գնումները կիրականացվեն մեկ անձից. բացառություն արվեց

Կառավարությունն իր այսօրվա՝ մայիսի 2-ի նիստում սահմանվեց, որ 2019-ին առողջապահության նախարարության կողմից տուլարեմիա պատվաստանյութի գնումներն իրականացվելու են ««Միկրոգեն» գիտաարտադրական միավորում» բաժնետիրական ընկերությունից` 1 դեղաչափը CIP Երեւան 104,95 ՌԴ ռուբլուն համարժեք դրամով (787 դրամ): Դա իրականացվելու է մեկ անձից գնման ձեւով:

Որոշման հիմնավորման մեջ նշվում է, որ նախագծի անհրաժեշտությունը պայմանավորված է պետության կարիքների համար տուլարեմիա պատվաստանյութը մատչելի գնով ձեռքբերման գործընթացի նորմատիվ-իրավական հիմքի ապահովմամբ:

Հայաստանում Պատվաստումների ազգային օրացույցով նախատեսված է իրականացնել պատվաստումներ տուլարեմիայի դեմ զորակոչային եւ նախազորակոչային տարիքի անձանց շրջանում, ինչպես նաեւ համաճարակաբանական ցուցումով: Պատվաստանյութն արտադրվում է բազմադեղաչափ՝ 30,35,40,45 եւ 50 դեղաչափ սրվակներով, որի արդյունքում պատվաստանյութի կորուստը լինում է բավականին բարձր՝ տարեկան միջին կորուստը կազմելով 50-60 տոկոս, քանի որ սրվակը բացելուց հետո պատվաստանյութը թույլատրվում է օգտագործել միայն երկու ժամվա ընթացքում:

Հաշվի առնելով այս հանգամանքը, նախազորակոչային եւ զորակոչային տարիքի անձանց պատվաստումները կազմակերպվում են միաժամանակյա՝ անտեղի կորուստից խուսափելու նպատակով:

Վերջին տարիներին տուլարեմիայի դեմ պատվաստանյութի ձեռքբերման գործընթացում եղել են դժվարություններ, քանի որ պատվաստանյութի արտադրության հետ կապված առկա են որոշ առանձնահատկություններ: Մասնավորապես շուկայում հայտնի է միայն մեկ արտադրող՝ Ռուսաստանի Դաշնության «Միկրոգեն» գիտաարտադրական միավորումը, որը ժամանակ առ ժամանակ ապահովում է միայն մեր երկրի կարիքների համար նպատակաուղղված արտադրություն:

Առողջապահության նախարարության կողմից վերջին 3 տարիների ընթացքում իրականացված գնման ընթացակարգերին տուլարեմիա պատվաստանյութի մասով գնային առաջարկ է ներկայացվել միայն «Տելիա-Մեդ» ՓԲԸ-ն (2018թ. Գնային առաջարկը 1 դեղաչափի համար կազմել է 1,186.06 ՀՀ դրամ` առանց ԱԱՀ): ««Միկրոգեն» գիտա-արտադրական միավորում» ԲԸ-ը իր գնային առաջարկը ներկայացրել է միայն առողջապահության նախարարության համար` CIP Երեւան պայմանով, միաժամանակ վերջինս հավաստիացրել է, որ ՀՀ-ում չունի պաշտոնական ներկայացուցչություն:

Հաշվի առնելով, տուլարեմիա պատվաստանյութի համար ներկայացված գնային առաջարկների տարբերությունը, բյուջետային միջոցների արդյունավետ օգտագործման առաջնահերթությունը, առողջապահության նախարարությունը նպատակահարմար է գտնում 2019թ. եւս իրականացնել տուլարեմիա պատվաստանյութի մեկ անձից գնում` ՌԴ ««Միկրոգեն» գիտա¬արտադրական միավորում» ԲԸ-ից: Այդ նպատակով, սույն նախագծով առաջարկվում է իրականացնել գնման ձեւի փոփոխություն:

Միաժամանակ, հաշվի առնելով, այն հանգամանքը, որ ««Միկրոգեն» գիտաարտադրական միավորում» ԲԸ կողմից ընդունելի եւ կիրառելի չեն կառավարության 2017 թվականի մայիսի 4-ի N 526-Ն որոշման N 1 հավել¬վածի 33-րդ եւ 71-րդ կետերով սահմանված պահանջները, ուստի սույն նախագծով առաջարկվում է բացառություններ սահմանել տումարեմիա պատվաստանյութի գնման գործընթացի համար: