Միջազգային հանրության գնահատականը կարևոր է, բայց ամենակարեւորը ՀՀ քաղաքացու գնահատականն է. Զոհրաբ Մնացականյան
Բոլորիդ հետ միասին շատ ոգեւորված եմ այսօրվա համար, որովհետեւ այս օրը արտահայտում է այն ինչ մենք ձգտել ենք 27 տարի, կառուցել մեր պետությունը, մեր երկիրը, որպես ժողովուրդ ունենալ հստակ արտահայտված ընտրություն, արժանապատվություն, վստահություն ու հարգանք, գիտակցում՝ աշխարհում քաղաքականության ունեցած դերի մասին: Այս մասին, այսօր՝ ապրիլի 27-ին, Քաղաքացու օրվա շրջանակում հանրային քննարկման ժամանակ նշեց Հայաստանի ԱԳ նախարար Զոհրաբ Մնացականյանը։
Ըստ նրա՝ հենց այս ամենի վրա պետք է կառուցել պետությունը, վերականգնել սուվերենությունը։
«Մենք բավական հզոր փորձ ենք ստեղծել՝ մարդու իրավունքը, մարդու տեղը հասարակության մեջ արտահայտելու, հասարակական կազմակերպությունների միջոցով, պետության դերը արտահայտելու որպես մարդուն ծառայություն մատուցող:
Այդ ամենն է քաղաքացու օրն, որովհետեւ քաղաքացին է հիմքը պետության, քաղաքացին իր ամբողջությամբ պետություն է, որտեղ ինքն է տերը իր իրավունքների, իր զարգացման, բարեկեցության, որը պահանջում է արդարություն, որը պահանջում է օրենքի գերակայություն։ Այստեղ կա գիտակցումը, որ կառավարության դերը քաղաքացուն ծառայություն մատուցելն է»,-ընդգծեց ԱԳ նախարարը՝ հավելելով, որ շատ կարեւոր է նաեւ կապը քաղաքացու հետ, որը զգոն է պահում կատռավարությանը եւ դա ուժեղացնում է կառավարության մանդատը:
Զոհրաբ Մնացականյանն ընդգծեց, որ թեեւ կարեւոր է միջազգային հանրության գնահատականը ՀՀ-ում տեղի ունեցող իրադարձություններին, սակայն ամենակարեւորը ՀՀ քաղաքացու գնահատականն է։ «Մենք պատասխանատու ենք առաջին հերթին մեր ժողովրդի առջեւ։ Ինչպես է Հայաստանի քաղաքացին ընդունում, գնահատում, թե ինչ է կատարվում Հայաստանում, թե ինչպիսին է հեղինակությունը Հայաստանում՝ սա առավել կարեւոր է»,– ասաց նախարարը։
Զոհրաբ Մնացականյանը նաեւ նշեց, որ Հայաստանը միջազգային հանրության անդամ է, 193 պետությունների ընտանիքի մաս է կազմում, երկիրը միջազգային հարաբերություններում պատասխանատովություն է կրում, օգտագործում է միջազգային հարաբերությունները, միջազգային համագործակցությունը, որպեսզի Հայաստանի ազգային նպատակները, ազգային օրակարգում ձեւավորված գերակայությունները առաջ տանի։
Ըստ նրա, Հայաստանը տարիներ շարունակ՝ համագործակցելով տարբեր փորձագիտական կենտրոնների հետ, աջակցել է երկրում ինստիտուտներ կառուցելուն. «Մեր քաղաքացիական հասարակությունը ակտիվ համագործակցում է տարբեր միջազգային հարթակներում։ Մեզ համար շատ էական է պահպանել այդ համագործակցության ձեւերը, որպեսզի միջազգային համագործակցությունը ծառայեցնենք առաջին հերթին մեր նպատակներին։ Մենք պատասխանտու ենք մեր երկրի, մեր երկրի հզորության համար»,– ասաց Զոհրաբ Մնացականյանը։