ԱՄՆ-ը կշարունակի «կոշտ միջոցներ» ձեռնարկել Ռուսաստանի նկատմամբ. Պոմպեո

Պետքարտուղար Մայք
Պոմպեոն խոստացել է, որ Միացյալ Նահանգները կշարունակեն ձեռնարկել «կոշտ
միջոցներ» Ռուսաստանի նկատմամբ հատուկ դատախազ Ռոբերտ Մյուլերի՝ Մոսկվայի՝
2016 թվականի նախագահական ընտրություններին միջամտելու փորձերի մասին
հայտարարությունից հետո, հաղորդում է AFP-ը:

Նրա խոսքերով՝ վարչակազմը մշտապես հնչեցնում էր այդ հարցը ռուսական
կողմի հետ յուրաքանչյուր հանդիպման ժամանակ: «Մենք կհասկացնենք, որ դա
անընդունելի վարքագիծ է»,-հայտարարել է Պոմպեոն մամուլի ասուլիսի ընթացքում
Ճապոնիայի արտաքին գործերի եւ պաշտպանության նախարարների հետ
բանակցություններից հետո: «Մենք կոշտ միջոցներ կձեռնարկենք, որոնք թանկ
կարժենան Ռուսաստանին իր նենգ գործողությունների պատճառով: Եւ մենք
կշարունակենք դա անել »,-ասել է նա:

Պոմպեոն նշել է, որ Միացյալ Նահանգները կշարունակեն այսուհետ պնդել, որ Ռուսաստանը չմիջամտի ընտրություններին ամբողջ աշխարհում:

Մյուլերի զեկույցն ապացուցել է, որ Թրամփը եւ նրա թիմի անդամները
Ռուսաստանի հետ դավադրության մեջ չեն եղել 2016 թվականի ընտրությունների
ժամանակ, սակայն մատնանշել է, որ ռուսական կողմը միջամտել էր ամերիկյան
ընտրություններին: