Մենք գիտենք Եթովպիայի ամուր ներուժը. Զոհրաբ Մնացականյան
Մենք մեծապես կարեւորում ենք Հայաստանի եւ Եթովպիայի միջեւ համագործակցության համար առկա հրաշալի ներուժի բացահայտումը: Այս մասին ապրիլի 3-ին, Եթովպիայում, այդ երկրի նորարարության եւ տեխնոլոգիաների նախարարի հետ հանդիպումից հետո լրագրողների հետ ճեպազրույցի ժամանակ նշել է Հայաստանի ԱԳ նախարար Զոհրաբ Մնացականյանը:
«Մենք երկու ազգ ենք, երկու ժողովուրդ, որոնք պատմության խորքից են միմյանց ճանաչում: Մենք ունենք խորը պատմական արմատներ:
Այժմ մենք հնարավորություն ունենք որպես ազգ պետություն, որպես երկրներ առավել ընդլայնել մեր համագործակցությունը` ի շահ մեր ազգերի, հանուն մեր ժողովուրդների զարգացման եւ մերձեցման:
Ուստի, մենք հավատացած ենք, հատկապես զարգացման ներկայիս դարաշրջանում, բոլորս գիտակցում ենք, որ միայն խելացի զարգացման ճանապարհով, երբ ժողովրդի տաղանդը լիովին անկաշկանդ դրսեւորվելու հնարավորություն ունի, միայն այդ ճանապարհով է հնարավոր հասնել կայուն զարգացման, որն իսկապես մնայուն է եւ մարդկանց մոտ իրականում արմատավորում է զարգացման օրակարգի նկատմամբ սեփականության զգացումը»,-ասել է Մնացականյանը:
Նա ընդգծել է, որ նորարարությունը, տեղեկատվական տեխնոլոգիաները, բարձր տեխնոլոգիաներն այն գործիքներն են, որոնք պետք է փոխանցվեն մարդկանց, որպեսզի նրանք կարողանան տնօրինել իրենց կյանքը եւ հարստության ստեղծումը:
«Մենք Հայաստանում մեր տնտեսության այդ ոլորտների՝ բարձր տեխնոլոգիաների, ստեղծարար կրթության զարգացման հետաքրքիր օրինակ, շատ հետաքրքիր ազգային փորձ ունենք։ Ես շատ հպարտ եմ, որ այս տարիների ընթացքում մենք հասել ենք մի հանգրվանի, երբ մեր ՀՆԱ 7․4 տոկոսն կազմում է այդ ոլորտը, որի տարեկան աճը վերջին ութ տարիների ընթացքում 25 տոկոսից ավել է։ Եվ դա շոշափելի արդյունք է տալիս, երբ մենք տեսնում ենք մարդկանց, երիտասարդ տաղանդների, որոնք վստահաբար պատասխանատվություն են ստանձնում իրենց կյանքի եւ զարգացման համար։
Մենք պատրաստակամ ենք կիսելու մեր փորձը։ Մենք միասին քննարկել ենք համատեղ աշխատանքի տարբեր ուղիներ։ Մենք գիտենք Եթովպիայի ամուր ներուժը եւ հակված ենք համադրելու այդ ներուժը այնպես, որ մեր երկու ազգերը կարողանան աշխատել միմյանց հետ եւ փոխշահավետ օգուտներ քաղեն՝ այդ համագործակցությունն իրական դարձնելով մեր ժողովուրդների համար։ Այսպիսով, մենք հավատում ենք, որ շատ լավ ներուժ ունենք դրա համար։
Իմ կողմից գլխավորած պատվիրակության կազմում ընդգրկված են նաեւ այդ ոլորտի ներկայացուցիչներ, որոնք առաջին ձեռքից ներկայացրեցին ամենը։ Ես չէ, որ պետք է ձեզ դա ներկայացնեմ, այլ դրանով փաստացի զբաղվողները։
Շատ շնորհակալ եմ կատարված լավ աշխատանքի համար: Մենք նաեւ ստորագրեցինք մի լավ հուշագիր երկու կողմերի միջեւ՝ խթանելու եւ հնարավորություն ընձեռելու նորարարության եւ ստեղծարար կրթության համար։ Մենք Հայաստանում շատ լավ տեխնոլոգիական քաղաք ունենք, որը կարող է դառնալ շատ լավ գործընկեր եթովպական գործընկերոջ համար՝ համատեղ աշխատելով այս համագործակցության ուղղությամբ։ Այնպես որ, ես իսկապես հույս ունեմ, որ այս այցը լավ սկիզբ կդառնա մեր ժողովուրդների միջեւ առավել ամուր եւ շոշափելի համագործակցության համար:
Եվ ես ակնկալում եմ նաեւ իմ գործընկերոջը տեսնել Հայաստանում, ինչը շատ լավ հնարավորություն կընձեռի այս համագործակցությունը շարունակելու, ինչպես նաեւ մեր կառավարությունների միջեւ համագործակցություն ծավալելու համար՝ բիզնես համայնքներին օգնելու նպատակով»: