Չափազանցված է իմ դերը հեղափոխության ընթացքում. Աննա Հակոբյան
Շարժման կամ հեղափոխության նկատմամբ իմ հավատը հիմնված էր առաջին հերթին ամուսնուս գործունեության վստահության վրա։ Այս մասին վարչապետի տիկին Աննա Հակոբյանն ասել է Ամերիկայի ձայնին տված հարցազրույցում։
«Երկար տարիներ նա հետապնդում էր այն ամեն ինչին, ինչը իրականություն
դարձավ հեղափոխությամբ։ Ես գիտեի, որ մի օր՝ ուշ թե շուտ, դա տեղի է
ունենալու։ Ինձ համար շատ անակնկալ էր, ինքը տանն ասաց, որ Սերժ Սարգսյանի
3–րդ ժամկետի դեմ պետք է գործողություն սկսի։ Ինֆորմացիան առաջին իսկ պահից
լսելուց հետո վստահ էր, որ այն ժամանակն է, որ ամեն ինչ հաջողությամբ է
ավարտվելու»,–ասել է Աննա Հակոբյանը։
Հարցին, թե ո՞րն էր ավելի բարդ՝ լինել քաղբանտարկյալ Նիկոլ Փաշինյանի՞
տիկինը, թե՞ վարչապետ Նիկոլ Փաշինյանի տիկինը, Աննա Հակոբյանը պատասխանեց,
որ հավասարապես բոլորը բարդ են. «Հավասար, որեւէ մեկն իր բարդությամբ չի
զիջում նախորդին»։
Աննա Հակոբյանի խոսքով, որքան ժամանակն անցնում է, այնքան լեգենդի է նմանվում իր դերը հեղափոխության մեջ եւ այնքան չափազանցվում է։
«Ես հուսով եմ, որ այս ընթացքն ինչ–որ մի պահի կկանգնի, որովհետու
անկեղծորեն եմ ասում, որ չափազանցված է իմ դերը հեղափոխության ընթացքում։
Ես, որպես էդպիսին դեր չեմ ունեցել, իմ ամբողջ դերակատարումը սահմանափակվել
է նրանով, որ ես իմ ամուսնու կողքին եմ եղել այդ քայլարշավի ընթացքում»,–
ասել է նա։
Հիշեցնենք, որ Աննա Հակոբյանը մեկնել է ԱՄՆ։ Երկու շաբաթից ավելի
տեւողությամբ Միացյալ Նահանգներ իր այցի ընթացքում Հայաստանի վարչապետի
տիկինը փորձելու է գումարներ հանգանակել «Իմ քայլը» եւ «Ժպիտների քաղաք»
բարեգործական հիմնադրամների համար, որոնք զբաղվում են կրթաթոշակների եւ
անապահով ընտանիքներին օգնությամբ, ինչպես նաեւ՝ քաղցկեղով հիվանդ
երեխաների բուժօգնության ֆինանսավորմամբ: Բոստոնում, Լոս Անջելեսում եւ
Նյու Յորքում Աննա Հակոբյանը հանդիպելու է նաեւ տեղի հայ համայնքի հետ: