Դատավոր Հեբոյանին կարդարացնեն, նախաքննական մարմինը ապացույցներ չունի. փաստաբան

Գագիկ Հեբոյանը մեղադրանքը չի ընդունում, ինքը տվյալ անձից կաշառք չի պահանջել, չի սակարկել եւ նրանից կաշառք չի ստացել: Այս մասին ասաց Կոտայքի մարզի ընդհանուր իրավասության դատարանի դատավոր Գագիկ Հեբոյանի փաստաբան Կրոմվել Գրիգորյանը։

Փաստաբանը պարզաբանեց, որ Գագիկ Հեբոյանն ընդամենը այն գումարն է
վերցրել, որ Նոր տարուց առաջ փաստաբան Վահագն Դանիելյանն էր որպես
փոխառության վերցրել, իսկ ամսի 27-ին 3 000 դոլարից 2400-ը վերադարձնել է,
իսկ մնացած մասը ոնց է հանձնվելու Հեբոյանին, դա արդեն կպարզվի։

Իսկ թե ԱԱԾ–ն ինչպե՞ս է իմացել դատավորի եւ փաստաբանի գումար
տալու–վերցնելու մասին, Կրոմվել Գրիգորյանն ասաց, որ դա իրենց գաղտնիքն է,
ինքը տեղյակ չէ։

Փաստաբանը նշեց, որ կաշառք պահանջելու վերաբերյալ Գագիկ Հեբոյանի դեմ
ԱԱԾ հաղոդում է  ներկայացրել Եղվարդ քաղաքի բնակիչ Բենիկ Հարությունյանը,
ում գործը 2013 եւ 2018թթ–երին եղել է Գագիկ Հեբոյանի վարույթում, անգամ
2013 թվականին դատարանի որոշումից հետո նրա բողոքի հիման վրա Հեբոյանը
կարգապահական տույժի է ենթարկվել։

«Հեբոյանը նրան միշտ թշնամի է ընդունել եւ Հեբոյանը նրանից ինչո՞ւ պիտի կաշառք պահանջեր»,– ասաց Կրոմվել Գրիգորյանը։

Գագիկ Հեբոյանի փաստաբանը վստահ է, որ այս ապացույցների պարագայում  Գ.
Հեբոյանին կարդարացնեն. «Հեշտ կլինի, քանի որ նախաքննական մարմինը
ապացույցներ չունի»։

Նշենք, որ ՀՀ ազգային անվտանգության ծառայության համապատասխան
ստորաբաժանումների կողմից իրականացված միջոցառումների արդյունքում տվյալներ
են ստացվել դատավորի կողմից իր լիազորությունների շրջանակներում անձի
օգտին որոշակի գործողություններ կատարելու համար առանձնապես խոշոր չափերով
կաշառք պահանջելու մասին:

Իրականացված օպերատիվ-հետախուզական միջոցառումների արդյունքում ՀՀ
ազգային անվտանգության ծառայության աշխատակիցների վերահսկողության ներքո
կաշառքի գումարը հանցակից փաստաբանի միջոցով փոխանցվել է դատավորին, որից
անմիջապես հետո ստացված գումարը վերջինիս մոտ հայտնաբերվել եւ վերցվել է:

Դատավորի կողմից առանձնապես խոշոր չափերով կաշառք ստանալու, վերջինիս
օժանդակելու եւ առանձնապես խոշոր չափերով կաշառք տալու դեպքերի առթիվ ՀՀ
քրեական օրենսգրքի 311-րդ հոդվածի 4-րդ մասի 2-րդ եւ 3-րդ կետերով,
38-311-րդ հոդվածի 4-րդ մասի 2-րդ եւ 3-րդ կետերով եւ 312-րդ հոդվածի 3-րդ
մասի 1-ին կետով ՀՀ ազգային անվտանգության ծառայության քննչական
դեպարտամենտում հարուցվել է քրեական գործ, որը նախաքննություն կատարելու
համար ուղարկվել է ՀՀ հատուկ քննչական ծառայություն:

ՀՀ դատական օրենսգիրք ՀՀ սահմանադրական օրենքի 51-րդ հոդվածով սահմանված
կարգով հանցանքը կատարելուց անմիջապես հետո բռնված դատավորը վերցվել է
արգելանքի, որի մասին նշված հոդվածով սահմանված կարգով տեղեկացվել են
Բարձրագույն դատական խորհրդի նախագահը եւ ՀՀ գլխավոր դատախազը։

Դատական իշխանության պաշտոնական կայքէջի համաձայն, 54-ամյա Հեբոյանը 
Կոտայքի մարզի ընդհանուր իրավասության դատարանում աշխատում է 1999-ից։