Բոլթոնն առաջարկել է ներառել Չինաստանին Ռուսաստանի եւ ԱՄՆ-ի հետ զինաթափման շուրջ բանակցային գործընթացում

Ազգային անվտանգության հարցերով ԱՄՆ-ի նախագահի խորհրդական Ջոն Բոլթոնը չի բացառել ԱՄՆ-ի եւ Ռուսաստանի բանակցությունները միջուկային զենքի վերահսկողության շուրջ եւ առաջարկել է հրավիրել նաեւ Չինաստանին, հաղորդում է ՌԻԱ Նովոստի-ն՝ հղում կատարելով The Hill-ին:

«Ներկայումս Չինաստանն ուժեղացնում է իր միջուկային ներուժը: Դա պատճառներից մեկն է, թե ինչու ենք մենք դիտարկում ԱՄՆ-ում հակահրթիռային պաշտպանության մեր ազգային համակարգերի ամրապնդման հարցը: Եւ եթե մենք պատրաստվում ենք անցկացնել եւս մեկ բանակցություններ զինամթերքը վերահսկելու հարցով, օրինակ, ռուսների հետ, դա պատճառներից մեկն է՝ ինչու կարող է իմաստ ունենալ Չինաստանին ներառելը այդ քննարկման մեջ»,-հայտարարել է Բոլթոնը:

Ընդ որում՝ Կրեմլում նշել են, որ դեռեւս որեւէ հստակ առաջարկ չի եղել:

Ավելի վաղ Դոնալդ Թրամփը հայտարարել էր, որ փետրվարի 2-ին Վաշինգտոնը սկսելու է ՄՓՀՀՊ-ից դուրս գալու գործընթացը: Պետքարտուղար Մայք Պոմպեոն ասել է, որ «եթե Ռուսաստանը չվերադառնա պայմանագրի դրույթների ամբողջովին եւ ստուգելի իրականացմանը վեց ամսվա ընթացքում, ապա պայմանագիրը կչեղարկվի»:

Նույն օրը Վլադիմիր Պուտինը հայտարարել էր, որ Ռուսաստանը նույնությամբ կպատասխանի ՄՓՀՀՊ-ից ԱՄՆ-ի դուրս գալու որոշմանը եւ նույնպես դադարեցնում է պայմանագրում իր մասնակցությունը: