Կնոջը հարվածել է մետաղյա ամրանով, թեյնիկով. նոր մանրամասներ՝ 20–ամյա Քրիստինեի մահվան դեպքի մասին
2018թ. նոյեմբերի 12–ին Երևանում դաժան ծեծի հետևանքով մահացած 20–ամյա Քրիստինեի վերաբերյալ գործը դատարանում է։ Դատական տեղեկատվական համակարգը տեղեկացրեց, որ գործով ամբաստանյալի կարգավիճակում է նրա ամուսինը՝ 30–ամյա Իլլարիոն Նունուշյանը։
Համաձայն մեղադրական եզրակացության՝ Նունուշյանը 2018 թ. նոյեմբերի 11-ին ժամը 06:30-ի սահմաններում իր տանը, գտնվելով ալկոհոլի ազդեցության տակ, խանդի հողի շուրջ վիճաբանել է իր կնոջ՝ Քրիստինե Իսկանդարյանի հետ։ Վիճաբանության ընթացքում ամուսինը շուրջ 5-10 րոպե ձեռքով, ոտքերով, ինչպես նաև մետաղյա ամրանով և մետաղյա թեյնիկով բազմաթիվ հարվածներ է հասցրել Քրիստինե Իսկանդարյանի գլխի, դեմքի, որովայնի, մեջքի, ինչպես նաև մարմնի մյուս մասերի՝ վերջնիս առողջությանը պատճատելով կյանքի վտանգ սպառնացող ծանր վնաս։
Հաջորդ օրը՝ ժամը 22:00-ին Էրեբունի բշժկական կենտրոնում Քրիստինեն գիտակցության չգալով մահացել է։
Նունուշյանին մեղադրանք է առաջադրվել ՀՀ ՔՕ 112–րդ հոդվածի 2–րդ մասի 14–րդ կետի հատկանիշներով՝ դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահ։
Երևանում դաժան ծեծի հետևանքով մահացած 20–ամյա Քրիստինեի ամուսինը,
30–ամյա Իլլարիոն Նունուշյանը, նախկինում դատապարտված է եղել։ Շենգավիթ
վարչական շրջանի ընդհանուր իրավասության առաջին ատյանի դատարանի 2014թ.
ապրիլի 17-ի դատավճռով՝ Նունուշյանը դատապարտվել է երեք տարի, երեք ամիս
ժամկետով ազատազրկման՝ խմբի կազմում գողություն կատարելու համար։
Նունուշյանի վերաբերյալ քննված քրեական գործի նյութերում տվյալներ կան այն
մասին, որ նա ունի սակավամտություն՝ «թեթև աստիճանի մտավոր հետամնացություն
վարքային խանգարումներով»։ Ըստ գործի նյութերի՝ նա ճանաչվել է սահմանափակ
մեղսունակ։
Դատական տեղեկատվական համակարգում հրապարակված դատավճռից երևում է, որ
Նունուշյանն ունի ութամյա կրթություն, ըստ իր հայտարարության՝ խնամքին երկու անչափահաս երեխա։