Քաղաքացին պետք է 100%-ով վստահ լինի, որ կառավարությունը, վարչապետն ապօրինության ոչ թե հովանավորն են, այլ հակառակորդը․ Փաշինյան
«Մեր համատեղ առաքելությունն է Հայաստանն իրավունքի ու արդարության, ճշմարտության ու արժեքների երկիր դարձնելը , և այդ առաքելությունից մենք չենք շեղվելու ոչ մի միլիմետր»,- այս մասին 2008 թվականի Մարտի 1-ի իրադարձությունների 11-րդ տարելիցին նվիրված իր տեսաուղերձում ասաց վարչապետ Նիկոլ Փաշինյանը:
Ըստ նրա՝ սա չի նշանակում, թե այսօրվա Հայաստանում այլևս չկան ապօրինությունների, իրավունքների ոտնահարման, նույնիսկ կաշառքի ու բռնության դեպքեր: Նման դեպքեր դեռ կան, կարող են լինել: Բայց յուրաքանչյուր քաղաքացի, ըստ Փաշինյանի, պետք է հարյուր տոկոսով վստահ լինի, որ կառավարությունը, վարչապետը որևէ ապօրինության ոչ թե հովանավորն է ու համակարգողը, այլ հակառակորդը:
«Ապօրինությունների, իրավունքների ոտնահարումների, չարաշահումների դեմ պայքարում, իշխանության վերնախավի կողմից թույլ տրված հանցագործությունների բացահայտման գործում մենք հաղթելու ենք անխուսափելիորեն, որովհետև ժողովուրդը և կառավարությունը միասնական են, իսկ այսպիսի միասնությունն անպարտելի է ու աներեր»,- ասաց Փաշինյանը:
Ապա վարչապետը կոչ արեց մասնակցել այսօրվա երթին, որով հարգանքի տուրք կմատուցվի Մարտի 1-ի զոհերի հիշատակին։