Ինչո՞ւ են աշխատանքից հեռացվել «ԲԷՑ»–ի մասնաճյուղի տնօրենն ու էլեկտրամանտյորը. «ԲԷՑ» պարզաբանումը

«Բարձրավոլտ էլեկտրացանցեր» փակ բաժնետիրական ընկերության «Հյուսիսային» մասնաճյուղի տնօրեն Էդգար Բոջուկյանը և նույն մասնաճյուղի բարձր լարման օդային գծերի ծառայության էլեկտրամանտյոր Վալերի Հարությունյանը ընկերության գլխավոր
տնօրեն Հայկ Հարությունյանի հրամանով 2019 թվականի մարտի 1-ից ազատվել են
աշխատանքից, քանի որ նրանց կողմից աշխատանքային պարտականությունների ոչ
պատշաճ կատարման արդյունքում ընկերությանը պատճառվել է նյութական վնաս: Այս
մասին հայտնեցին «Բարձրավոլտ էլեկտրացանցեր» ընկերության Հասարակայնության հետ կապերի բաժնից։

2018 թվականի դեկտեմբերին ընկերության գլխավոր տնօրենի հանձնարարականով
ստեղծվել էր աշխատանքային խումբ, որը «Հյուսիսային» մասնաճյուղում իրականացրել էր ստուգումներ: Ստուգումների արդյունքում տեղում արձանագրվել են թերություններ և պակասորդներ: Մասնավորապես անհետացել են ընկերությանը պատկանող երկու տնակները: Ի դեպ տնակների անհետացման ժամանակաշրջանում Վալերի Հարությունյանն եղել է դրանց նյութական պատասխանատուն:

Ստուգումներից հետո, 2019 թվականի փետրվարի 12-ին, «Հյուսիսիային» մասնաճյուղի՝ տվյալ գործում ներառված անձանցից պահանջվել է բացատրագիր տնակների անհետացման վերաբերյալ: Սակայն մինչ այսօր որևէ բացատրություն նրանք չեն ներկայացրել:

Էդգար Բոջուկյանը և Վալերի Հարությունյանը աշխատանքային պարտականությունների ոչ պատշաճ կատարման (անգործության) հետևանքով ազատվել են աշխատանքից: Ազատման հրամանի հետ մեկտեղ վերջիններիս ներկայացվել է նաև ընկերությանը պատճառված վնասի փոխհատուցման պահանջ»,– ասվում է հաղորդագրությունում:

Ավելի վաղ հայտնել էինք,«Բարձրավոլտ էլեկտրացանցեր» ընկերության հյուսիսային մասնաճյուղի աշխատակիցներն այսօր՝ փետրվարի 28-ին,  փակել են Մ-6 միջպետական ճանապարհը։

Ինչպես հայտնում է shamshyan.com-ը, «Բարձրավոլտ էլեկտրական ցանցեր»-ի
հյուսիսային մասնաճյուղի տնօրեն Էդգար Բոջուկյանը լրագրողների հետ զրույցում ասել է, որ «ԲԷՑ»-ը իրեն ու ևս մի քանի աշխատակիցների առանց որևէ հիմնավոր պատճառի ազատել է աշխատանքից:

Կարճ ժամանակ անց տնօրենի հետ կապ են հաստատել «ԲԷՑ»-ի գլխամասից ու
տեղեկացրել, որ տնօրենը վաղը կհանդիպի իրենց հետ: Աշխատակիցները բացել են
ճանապարհը՝ նշելով, որ վաղվա հանդիպումը եթե դրական արդյունք չտա, իրենք
շարունակելու են ճանապարհներ փակել: