Շտկման ենթակա ի՞նչ խնդիրներ կան ընտրական գործընթացում. ԿԸՀ նախագահի պարզաբանումը (տեսանյութ)
Ավելի վաղ հայտնել ենք, որ Պետական-իրավական հարցերի մշտական հանձնաժողովն արտահերթ նիստ է հրավիրել: Օրակարգում ընդամենը մեկ հարց է՝ «Հայաստանի Հանրապետության Ազգային ժողովի 2018 թվականի դեկտեմբերի 9-ի արտահերթ ընտրությունների մասին» Կենտրոնական ընտրական հանձնաժողովի գործունեության վերաբերյալ հաղորդումը: Հիմնական զեկուցողը ԿԸՀ նախագահ Տիգրան Մուկուչյանն էր, իսկ նիստը վարել է հանձնաժողովի նախագահ Վլադիմիր Վարդանյանը:
Նիստից հետո, պատասխանելով լրագրողների հարցերրին, ԿԸՀ նախագահը խոսել է այն մասին, թե ինչ խնդիրներ են նկատվել, որոնք լուծման կարիք ունեն.
«Կան խնդիրներ, որոնք առնչվում են նախընտրական քարոզչության կազմակերպման առանձին դետալների, կան խնդիրներ, որոնք վերաբերում են դիտորդական առաքելությունների աշխատանքի կազմակերպման արդյունավետության բարձրացմանը, կան խնդիրներ, որոնք վերաբերում են Քրեական օրենսգրքի, Վարչական օրենսգրքի կանոնակարգումների կատարելագործմանը»,-ասել է Մուկուչյանը` հավելելով, որ խոսքն այն խնդիրների մասին է, որոնք ի հայտ են գալիս պրակտիկ գործունեության արդյունքում: