Զոհրաբ Մնացականյանը հանդիպել է Ռիյգիկոգուի արտաքին հարաբերությունների հանձնաժողովի նախագահի հետ

Փետրվարի 8-ին Տալլին կատարած պաշտոնական այցի շրջանակներում ԱԳ նախարար Զոհրաբ Մնացականյանը հանդիպում է ունեցել Էստոնիայի խորհրդարանի (Ռիյգիկոգու) արտաքին հարաբերությունների հանձնաժողովի նախագահ Մարկո Միհկելսոնի և հանձնաժողովի անդամների հետ։

Կողմերը կարևորել են երկու երկրների միջև համագործակցության ակտիվացումը խորհրդարանական ձևաչափով՝ որպես երկկողմ օրակարգի առաջմղման կարևոր հարթակի՝ ուղենշելով այդ ուղղությամբ ձեռնարկվելիք գործնական քայլերը։

Զրուցակիցների խնդրանքով ԱԳ նախարար Մնացականյանն անդրադարձել է Հայաստանի արտաքին քաղաքական առաջնահերթություններին, Հայաստանում տեղի ունեցած վերջին ներքաղաքական զարգացումներին: Այդ առումով նախարար Մնացականյանն ընդգծել է, որ կառավարությունն իր գործողություններով ապացուցել է քաղաքական կամքը՝ կյանքի կոչելու ժողովրդի լայն մանդատի հիման վրա նախաձեռնված բարեփոխումները:

Հայաստանի արտաքին քաղաքական գերատեսչության ղեկավարը Ռիյգիկոգուի արտաքին գործերի հանձնաժողովի անդամներին ներկայացրել է Հայաստանի արձանագրած ձեռքբերումները նորարարության և թվային տեխնոլոգիաների, ստեղծարար կրթության զարգացման ուղղությամբ՝ կարևորելով տվյալ ոլորտում երկկողմ փորձի փոխանակումը և համագործակցության խորացումը։ Այս առնչությամբ նախարար Մնացականյանը բարձր է գնահատել այցի ընթացքում Էստոնիայի բարձր տեխնոլոգիաների և թվային ոլորտի առաջատար մասնագետների և պաշտոնյաների հետ կայացած հանդիպումներն ու քննարկումները՝ հույս հայտնելով, որ դրանք լավ հիմք կծառայեն գործնական և փոխշահավետ համատեղ ծրագրեր նախաձեռնելու համար:

Նախարար Մնացականյանը և Մարկո Միհկելսոնը մտքեր են փոխանակել Հայաստան-Եվրոպական միություն համագործակցության շուրջ՝ ընդգծելով Արևելյան գործընկերության կարևորությունը՝ որպես ԱլԳ մասնակից երկրների համար Եվրամիության և անդամ պետությունների հետ համագործակցություն ծավալելու օգտակար հարթակի: