Ես զարմանում եմ Հայաստանի իշխանության վրա. իրանագետ
Իրանագետ Վարդան Ոսկանյանը այսօրվա ասուլիսի ժամանակ հայտարարել է, թե իր համար անհասկանալի է, թե ինչու Հայաստանի իշխանությունը կոնկրետ գործնական քայլեր չի ձեռնարկում` միանալու ամերիկյան պատժամիջոցները շրջանցող եվրոապական ծրագրերին` Իրանի հետ համագործակցելու առումով:
ԱՄՆ նախագահի խորհրդական Ջոն Բոլթոնը Հայաստանում արեց հստակ հակաիրանական հայտարարություն, ինչն, ըստ Ոսկանյանի, կարող է բացասական հետևանքներ ունենալ հայ-իրանական հարաբերությունների վրա: Այդ առումով բանախոսն ասել է, որ պետք է Իրանին հստակ ցույց տալ, որ Հայաստանը որևէ երկրի ազդեցության տակ ընկնել չի կարող և շարունակելու է խորացնել համագործակցությունը Իրանի հետ:
«Եթե մենք չենք ձևավորում մեր երկրի համար տեսլական, որի մի մասը կապված է հենց Իրանի հետ, չենք կարողանա զարգանալ»,- ասել է Վարդան Ոսկանյանը:
Հարցին, թե իշխանության մաս կազմող գործիչների կողմից վերջին ամիսներին Երևանում հնչած հակաիրանական հայտարարությունները ի՞նչ ազդեցություն կարող են ունենալ հայ-իրանական հարաբերությունների վրա, Վարդան Ոսկանյանը պատասխանել է, որ Իրանի իշխանությունը գիտակցում է հայ-իրանական հարաբերությունների կարևորությունը, հետևաբար այդ հայտարարությունները դեռևս բացասաբար չեն ազդում, սակայն կարող է վտանգավոր լինել, եթե հակաիրանական հայտարարությունները Հայաստանից այնքան շատանան, որ քանակով ազդեցություն սկսեն թողնել:
Ինչ վերաբերում է ամերիկյան միլիարդատեր Ջորջ Սորոսի կողմից հնչեցվող հայտարարություններին` կապված հայ-իրանական հարաբերությունների հետ, Ոսկանյանն արձագանքել է, որ ՀՀ-Իրան սահմանը հնագույն սահմաններից է, ունի հազարամյակների պատմություն, և պետք է որևէ կերպ թույլ չտալ, որ դրանք ազդեցություն թողնեն: Միաժամանակ Վարդան Ոսկանյանը զգուշացրել է, որ իրանցիները կողմնակի ասված խոսքերը հաճախ ընկալում են որպես ուղերձ, հետևաբար պետք է զգույշ լինել: