Մանվել Գրիգորյանն արգելել է պաշտպաններին՝ անդրադառնալ ՄԻԵԴ դիմելու թեմային

Կալանքի տակ գտնվող ԱԺ նախկին պատգամավոր, գեներալ Մանվել Գրիգորյանի գործով ՄԻԵԴ ներկայացվելիք գանգատն ընթացքի մեջ է: Այս մասին այսօր՝ փետրվարի 1-ին լրագրողերի հետ հանդիպմանն ասաց Գրիորյանի պաշտպաններից Լևոն Բաղդասարյանը:

Նա նշեց, որ թեև իր պաշտպանյալը շարունակում է պնդել, որ Հայաստանին դատի չի տա, սակայն առողջողջական խնդիրների հարցով իրենք, այնուամենայնիվ կդիմեն միջազգային դատական ատյանին:

«Մանվել Գրիգորյանն ասել է՝ այդ թեմային էլ չանդրադառնաք, բայց առողջությունը բարձր արժեք է և դրա հետ կապված պետք է բարձրաձայնենք»,-ասաց նա:

Փաստաբանի խոսքով՝ Գրիգորյանը ՔԿՀ-ում բուժում է ստանում հարազատների կողմից ներկայացված դեղամիջոցներով.

«Ցավազարկող դեղերի ազդեցության տակ կարողանում է կալանք կրել, նրա շաքարի մակարդակը 25 է, ինչի պայմաններում նրա վիճակը գնալով վատթարանում է»,-ասաց նա:

Փաստաբանը հայտարարեց, որ ներկայիս իշխանությունների օրոք երկրում ընտրովի արդարադատություն է իրականացվում, որն ըստ նրա՝ որոշ գործերով կապված է պետակա լիազոր մարմնի քմահաճույքով:

«Պետությունն՝ ի դեմս առաջին դեմքի, որոշակի գործերով դառնում է դահիճ, այսօր ՀՀ-ում փողոցային արդարադատությու է տեղի ունենում: Փողոցում պարտադրեցին, որ Մանվել Գրիգորյանը կրկին կալանավորվի, ինչն անթույլատրելի է: Ժողովրդի բերանը գցեցին խտացրած կաթի, զինվորի պայոկի մեղադրանքը, այդ նենգ, զզվելի արարքների մեջ նրան մեղադրելով՝ նրա նկատմամբ հանրային կարծիք ձևավորեցին:

Հիշեցնենք, որ հունվարի 22–ին ՀՀ վերաքննիչ քրեական դատարանի դատավոր Արսեն Նիկողոսյանը բավարարեց ՀՀ գլխավոր դատախազության բողոքն ու որոշում կայացրել կրկին կալանավորել Մանվել Գրիգորյանին։ Դատարանը միևնույն ժամանակ մերժել էր պաշտպանական կողմի ներկայացրած՝ Գրիգորյանի նկատմամբ գրավը թույլատրելի ճանաչելու դատարանի որոշումը։

Իսկ 2018թ. դեկտեմբերի 21–ին Երևան քաղաքի ընդհանուր իրավասության դատարանը որոշում էր կայացրել 25 մլն դրամ գրավի դիմաց ազատ արձակել Մանվել Գրիգորյանին։

ԱԺ նախկին պատգամավորը կալանավորվել է 2018թ. հունիսի 19-ին`Երևանի ընդհանուր իրավասության դատարանի դատավոր Մարինե Մելքոնյանի որոշմամբ: Գրիգորյանին մեղադրանք է առաջադրվել ապօրինի կերպով ռազմամթերք ձեռք բերելու և նրա կնոջ` Նազիկ Ամիրյանի, դստեր` Այծեմնիկ Գրիգորյանի, Էջմիածին քաղաքի բնակիչներ Սեյրան Ազարյանի, Արմեն Հակոբյանի և այլ անձանց հետ նախնական համաձայնությամբ իրեն պատկանող առանձնատներում պահելու համար, ինչպես նաև՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափի ուրիշի գույք հափշտակելու համար: