Դանակահարել են մսավաճառի երկու որդիներին. նա էլ կացինով հարվածել է փախչողների մեքենային. մանրամասներ

ՀՀ քննչական կոմիտեի Լոռու մարզային քննչական վարչությունում ավարտվել է Վանաձորում երկու եղբայրներին դանակահարելու դեպքի առթիվ հարուցված քրեական գործի նախաքննությունը: Մեղադրանք է առաջադրվել Լոռու մարզի բնակչին:

ՀՀ Քննչական կոմիտեից հայտնում են, որ 2018 թվականի օգոստոսի 30-ին՝ ժամը 16:00-ի սահմաններում, «կրծքավանդակի ձախ կեսի ծակած-կտրած վերք» ախտորոշմամբ «Վանաձորի բժշկական կենտրոն» ՓԲ ընկերություն է տեղափոխվել Վանաձոր քաղաքի բնակիչը՝ ծնված 1993թ., ինչպես նաև նրա անչափահաս եղբայրը՝ ծնված 2002թ.՝ «ձախ աճուկային շրջանի թափանցող վերք» ախտորոշմամբ:

Դեպքի առթիվ ՀՀ ՔԿ Լոռու մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասով, կազմվել քննչական գործողությունների եւ օպերատիվ-հետախուզական միջոցառումների պլան:

Քրեական գործով ձեռնարկված մեծածավալ քննչական եւ դատավարական գործողությունների արդյունքում պարզվել են դեպքի հանգամանքները, դրդապատճառը:

Քննությամբ ձեռք բերված տվյալների համաձայն՝ Վանաձոր քաղաքում գործող մսի խանութում խանութի տիրոջ եւ Լոռու մարզի 28 եւ 31-ամյա բնակիչների միջեւ մսին ձեռք տալու կապակցությամբ վիճաբանություն է առաջացել: Լսելով վիճաբանության ձայները՝ նրանց են մոտեցել խանութի տիրոջ 17 եւ 26-ամյա որդիները, որից հետո 28-ամյա տղամարդը դիտավորությամբ դանակով հարվածել է նախ 26-ամյա երիտասարդի կրծքավանդակի ձախ կեսին, ապա նաեւ վերջինիս անչափահաս եղբոր ձախ աճուկային շրջանին՝ նրանց պատճառելով կյանքին վտանգ սպառնացող ծանր վնաս:

Այնուհետեւ, խանութի տերը, տեսնելով, որ 28 եւ 31-ամյա տղամարդիկ ցանկանում են փախուստի դիմել «ԲՄՎ 525» մակնիշի ավտոմեքենայով, որդիներին դանակահարելու կապակցությամբ վրեժխնդիր լինելու դրդապատճառով, կացնով դիտավորությամբ հարվածել եւ ջարդել է 31-ամյա տղամարդուն պատկանող «ԲՄՎ 525» մակնիշի ավտոմեքենայի հետեւի հողմապակին:

Ձեռք բերված բավարար ապացույցների համակցությամբ՝ Լոռու մարզի 28-ամյա բնակչին մեղադրանք է առաջադրվել՝ ՀՀ քրեական օրենսգրքի 112-րդ հոդվածի 2-րդ մասի 1-ին կետով, եւ նրա նկատմամբ որպես խափանման միջոց է ընտրվել կալանավորումը: Խանութի տիրոջը մեղադրանք է առաջադրվել՝ ՀՀ քրեական օրենսգրքի 185-րդ հոդվածի 1-ին մասով, եւ նրա նկատմամբ որպես խափանման միջոց ընտրվել ստորագրություն չհեռանալու մասին:

Նախաքննությունն ավարտվել է, եւ քրեական գործը՝ մեղադրական եզրակացությամբ, ուղարկվել քրեական գործի նախաքննության նկատմամբ հսկողություն իրականացնող դատախազին: