Հայաստանը համարվում է նախկին Խորհրդային Միության Սիլիկոնային հովիտը. Փաշինյան

Հայաստանը համարվում է նախկին Խորհրդային Միության Սիլիկոնային հովիտը, որտեղ արտադրվել է Նաիրի-2-ը՝ խորհրդային ժամանակաշրջանի առաջին կիսահաղորդչային համակարգիչը և աշխարհում առաջիններից մեկը: Այս մասին, այսօր՝ հունվարի 31-ին, Քյոլնի Տեխնիկական համալսարանում ունեցած իր ելույթում նշել է ՀՀ վարչապետ Նիկոլ Փաշինյանը: Նա ելույթ է ունեցել «Հայաստանը թավշյա հեղափոխությունից հետո. Թվային և տեխնոլոգիական դարաշրջանի խոստման իրագործումը» թեմայով:

«ԽՍՀՄ-ի սուզանավերի և տիեզերանավի համար հաշվարկային համակարգերի և էլեկտրոնիկայի հիմնական բաղադրատարրերի մեծ մասը հղացվել և արտադրվել է Հայաստանում: Կիսահաղորդչային տեխնիկա նախագծող, արտադրող, փորձարկող և ինտեգրող կենտրոնների մեծ մասը գործում էին Հայաստանում», - ասել է Փաշինյանը:

«Այսօր Հայաստանի ներուժը ընդլայնվել է: ՏՏ ոլորտը Հայաստանում վերջին յոթ տարիների ընթացքում աճել է հինգ անգամ, տարեկան 25 տոկոսով: Synopsys, National Instruments, Cisco, VMWare, TeamViewer, Mentor Graphics-ը (Siemens- ին պատկանող) և շատ այլ անդրազգային ընկերություններ գիտահետազոտական գրասենյակներ ունեն Հայաստանում, որոնցում ներգրավված են հազարավոր մասնագետներ, ովքեր լուծում են 5G և մեքենայական կապին, իրերի համացանցին (Internet of Things), արհեստական ինտելեկտին, ռոբոտներին առնչվող բարդ խնդիրներ», - նշել է Փաշինյանը: