ԱՊՊԱ պայմանագրերի առցանց կնքում, վնասի փոխհատուցման և այլ ընթացակարգերի ավտոմատացված համակարգ. ASWA վեբ հարթակի առավելությունները
Bureau Veritas միջազգային ընկերության հայաստանյան դուստր ձեռնարկությունը գործարկել է «Ավտոապահովագրական մեկ պատուհան»՝ ASWA վեբ հարթակը, որը միտված է ԱՊՊԱ գործընթացի համապետական մակարդակով թվայնացմանն ու ավտոմատացմանը: Ավտոապահովագրողների բյուրոյի և ապահովագրական ընկերությունների մասնակցությամբ գործող վեբ հարթակը մեկ պատուհանի սկզբունքով գործընթացի շահառուներին մի շարք առավելություններ է տրամադրում:
ASWA համակարգի կատարողականության պատասխանատու Արման Ստեփանյանը
ներկայացրեց հարթակի հիմնական գործառույթներն ու 2019-ին սպասվող ծրագրերը:
Վեբ հարթակն իրական ժամանակում սինխրոնիզացնում է հանրային (ՀՀ ԿԲ և
Ճանապարհային Ոստիկանության) և մասնավոր (ապահովագրական ընկերություններ և
բանկեր) ռեգիստրները և ստանդարտացնում դրանց տվյալները: Այն ապահովում է
ավտոմատացված թափանցիկ և վերահսկելի գործընթաց:
«ASWA-ն պլատֆորմ է, որը միացված է ապահովագրական ընկերությունների ներքին ծրագրերին, Ճանապարհային ոստիկանությանը, ԿԲ-ում տեղակայված, նախկինում արդեն իսկ գրանցված ԱՊՊԱ պայմանագրերի բազային և այլ համակարգերին: Մենք օգտվում ենք հաստատված, ճշգրտված տեղեկատվական հենքերից: Հարթակն իրականացնում է այդ բոլոր տվյալների միասնական հավաքագրում, ինչպես նաև գործում է միանձնյա մուտքի սկզբունքը, ըստ որի՝ օգտատերը, մեկ անգամ մուտք գործելով հարթակ, կարողանում է օգտվել առաջարկվող բազմաթիվ մոդուլներից»,-ասաց Արման Ստեփանյանը:
Հարթակում ներառված է ԱՊՊԱ պայմանագրերի կնքման մոդուլը, որն արդեն իսկ գործում է 2017թ.-ի նոյեմբերի 1-ից: Մինչև 2018-ի դեկտեմբերի 31-ը ներառյալ կնքվել է ավելի քան 1 միլիոն ԱՊՊԱ պայմանագիր: Օգտատերը մուտք է գործում aswa.am կայք ու սեղմելով առցանց պայմանագրի կնքման կոճակը՝ մուտքագրում է տրանսպորտային միջոցի և նրա սեփականատիրոջ անձնական տվյալները, ընտրում իր նախընտրած ապահովագրական ընկերությանն ու ընթացիկ այլ քայլերից հետո կնքում պայմանագիրը՝ այսպիսով խնայելով իր ժամանակը:
Առցանց պայմանագրի կնքումը հնարավորություն է տալիս նաև առցանց և վճարային տերմինալների միջոցով ինքնուրույն պայմանագիր կնքելու 5 տոկոս զեղչված ապահովագրավճարով:
Ստեփանյանը նշեց, որ 2019-ին կներդրվի փոխհատուցումների կառավարման մոդուլ, որը միտված է լինելու ամբողջական գործընթացն ավտոմատացնելուն, ավտովթարի ազդարարումից մինչև փոխհատուցում և փոխհաշվարկների կարգավորում, ինչպես նաև կստեղծվի վնասի գնահատման շուկայական արժեքի համապետական ուղեցույց:
«Պատահարի գրանցման ժամանակ պատահարի մասնակիցներն արդեն իսկ հայտնի են
լինելու և հայտնի են իրենց ապահովագրական ընկերությունները, ու իրական ժամանակում բոլոր ընկերությունները տեղեկացվում են պատահարի մասին: Իրական
ժամանակում կատարվող ծանուցումը նպաստում է հատուցման գործընթացի արագացմանը: Մեր վերջնական նպատակն է գործակալ-վարորդ շփումը հանելն ու
ամբողջ կապն ապահովել համակարգի միջոցով»,-ասաց նա:
2019-ին ներդրվելու է նաև պատահարների գրանցման բջջային հավելվածը, որը
փոխարինելու է երկարատև թղթաբանությանը: Բջջային հավելվածը հավաքագրում է
ինֆորմացիան միայն ավտոմատ կերպով. «Նշվում է դեպքի վայրը, վնասվածքի
նկարահանում է իրականացվում, մնացած բոլոր տեղեկությունը սկանավորվում է
վարորդական իրավունքի և մեքենայի տեխանձնագրի վրայից: Բջջային հավելվածով
գրանցված վթարները միանգամից հայտնվում են ապահովագրական ընկերությունների
ուշադրության կենտրոնում, այլևս զանգելու կարիք էլ չկա: Իրենք արդեն տեղեկանում են, որ իրենց մոտ գրանցված տրանսպորտային միջոցը վթարի է ենթարկվել: Բջջային հավելվածը թույլ է տալիս նաև կրճատել պատահարների պատճառով փողոցում առաջացող խցանումները: Իրենք չեն կանգնելու, սպասեն, մինչև ԱՊՊԱ գործակալը կբերի համապատասխան թուղթը, որ լրացնեն»:
ASWA հարթակը դասվում է լավագույն միջազգային ծրագրերի շարքին և շահեկանորեն տարբերվում է ԵԱՏՄ-ում և ընդհանուր տարածաշրջանում իրականացվող ԱՊՊԱ ոլորտի նմանատիպ ծրագրերից: Ապագայում հնարավոր է հարթակը մատուցի նաև լրացուցիչ ծառայություններ՝ կապված ավտոմեքենաների պատմության «Քարֆաս» ծրագրի, ավտոմեքենաների շուկայական արժեքի, տեխզննման և այլնի վերաբերյալ: