Մեր գործունեությունն իրականացնելու ենք թռուցիկներով, որը կառավարությանը կհեղինակազրկի. Իրավապաշտպան
Նախորդ տարիներին Հայաստանում գործել է և այժմ շարունակում է գործել վնասակար և չարամիտ օրենսդրություն, երբ փոքրամասնության շահերն պաշտպանելու և ամրապնդելու համար ոտնահարվել են մեծամասնության իրավունքները։ Այս մասին այսօր՝ հունվարի 25-ին, լրագրողների հետ հանդիպմանն ասաց «Հայ տնտեսվարողների և սպառողների իրավապաշտպան կենտրոնի» նախագահ Արթուր Աթոյանը:
«Իրավակիրառ համակարգում կան իրավական նորմեր և օրենքներ, բայց ցանկացած պաշտոնյա յուրովի է մեկնաբանում և ներկայացնում օրենսդրությունը, որքան որ իր զարգացվածությունը թույլ է տալիս հասկանալ օրենքի պահանջը։ Այսինքն՝ պաշտոնյան ելնում է իր ցանկություններից»,–նշեց իրավապաշտպանը։ Նրա խոսքով՝ չկա պաշտոնյային կարգի հրավիրելու մեխանիզմ կամ վատագույն դեպքում այդ մեխանիզմն այնքան ծախսատար է, որ մարդիկ գերադասում են չդիմել դրան. «Օրինակ, օրենքի խախտումով վարչական տուգանք է սահմանվում, սակայն նրա փաստաբանական պաշտպանությունը ավելի թանկ է, քան ինքը վարչական տուգանքը, դրան գումարած ժամանակածախսը»։
Փորձագետի փոխանցմամբ՝ դատական համակարգի հիմնավոր բարեփոխումների ծրագիր պետք է մշակվի։ Նա նշում է՝ դատական համակարգում առկա թերությունների պատճառով այսօր շատ են խախտվում տնտեսվարողների և սպառողների իրավունքները. «Դատական համակարգում կան պաշտոնյաներ, որոնք նույնիսկ չեն պատկերացնում, թե ինչպես կարելի է վերափոխվել, նրանցից պետք է շուտափույթ ձերբազատվել։ Գրություններին ընդհանրապես չեն պատասխանում, իսկ դատական գործընթացներում թույլ են տալիս տարատեսակ խախտումներ։ Իսկ երբ դիմում ես խախտված իրավունքերի հարցով, իմանալով, որ իրենք սխալ են արել, հօգուտ քեզ վճիռ են կայացնում՝ ցանկանալով քեզ շոյել»։
Իրավապաշտպանը նաև բողոքեց վարչապետի աշխատակազմից. «Վարչապետի աշխատակազմը «վթարային» վիճակում է, գրություններին չեն պատասխանում։ Մեր կազմակերպության գրությունները ետին պլան են մղվել այն դեպքում, երբ մենք հանրային շահ ենք ներկայացնում»։
Նա հայտնեց՝ իրենց հետագա գործունեությունն իրականացնելու են թռուցիկներով. «Մեզ չի հետաքրքրում, որ դա կառավարությանը կհեղինակազրկի»։
Նրա կարծիքով կառավարությունում պաշտոններում նշանակվում են ըստ վստահության աստիճանի, և տվյալ անձը տեսնելով, որ վստահության աստիճանը իր նկատմամբ բարձր է, սկսում է լճանալ։
Իրավապաշտպանի կարծիքով՝ վարչապետի աշխատակզմն ու կառավարությունը չեն հետևում վարչապետի հանձնարարականներին, չեն կատարում դրանք։ Նրա համոզմամբ՝ սա վատթարագույն հետևանքների կարող է հանգեցնել։