Ընտրական օրենսգրքի «բարեփոխված» տարբերակը ձեռնատու չէ ժողովրդի իշխանությանը

Ընտրական օրենսգրքի «բարեփոխված» տարբերակը ձեռնատու չէ ժողովրդի իշխանությանը: Ասեմ ավելին. այն հակասում է «Թավշյա հեղափոխության» ժողովրդի համար շահեկան եզրահանգման տրամաբանությանը: Առաջարկվող Ընտրական օրենսգիրքը ընդունվելու պարագայում կվտանգվի Հայաստանում քաղաքական մշակույթի արագ առողջացումը՝ հնարավորություն ընձեռելով որոշ «արհեստական շնչառության տակ» գտնվող հին ուժերին վերարտադրվելու նոր ԱԺ-ում:

Այն, որ գործող Ընտրական Օրենսգիրքը չափազանց հեռու է որակյալ համարվելուց, որ նրանում առկա, շատերի մոտ ահասարսուռ ազդեցություն ունեցող «ռեյտինգային» ձևաչափը պարզապես անհեթեթություն է, որևէ առարկություն չկա: Համակարծիք եմ, որ գործող Ընտրական օրենսգիրքը ենթակա է արդիականացման, որ նոր Հայաստանում չի կարող գործել հին կուսակցապետությանը ծառայող Ընտրական օրենսգիրք: Բա՛յց, այն չպե՛տք է փոխվի հիմա, քանի որ՝ 1. Վենետիկի հանձնաժողովի նախագահ Ջանի Բուկիկիոն ասել էր, որ Ընտրական օրենսգրքի փոփոխությունից հետո արտահերթ ընտրությունները պետք է տեղի ունենան 6 ամիս անց, սակայն եթե կա քաղաքական կոնսեսուս, ապա դա չի խանգարի:

Երկստանդարտ քաղաքական գործընթացը չպետք է ստվերի քաղաքական ակտի հետագա վերծանումը: Եթե միջազգային կազմակերպության կողմից սահմանված կարգը սահմանել է համապատասխան ընթացակարգ և մեր երկրում իրականացվող գործընթացի ընթացքում կանչ ենք տալիս տվյալ նորմերին, ապա քաղաքական հայտարարությունները չեն կարող գերակայել ընդունված ստանդարտներին: Չպարզվի վաղը, որ քաղաքական կոնսենսուս ոչ էլ եղել է, ամեն ինչ կատարվելի բռնի կերպով... 2.Ռեյտինգային ձևաչափը դեֆակտո չի կարող գործել նոր իրողությունների պայմաններում:

Ոչ ոք չի կարող գործարկել ընտրակաշառքի, ընտրաահաբեկման և այլ զարթուղի, ապօրինի ինստիտուտներ «ռեյտինգ» ապահովելու համար: Այս պարագայում կգործի «մարդը կամ հարգված է, կամ ոչ» մեթոդը: Ընդ որում նախկին քաղաքական անբարեխիղճ ակտիվության և հեղինակազուրկ ուժերին համերաշխության փաստը աշխատելու է ի վնաս այս կամ այն գործիչի հեղինակությանը: 3. Ներկայիս ներքաղաքական իրավիճակը պարզապես փլուզված է՝ կա իշխանություն, որը ներկայացնում է չկայացած քաղաքական ուժ, չկա ընդդիմություն, կան մի քանի գաճաճ, բայց բարվոք համբավ ունեցող քաղաքական ուժեր, առկա է ջախջախված ճակատ և հին իրողություններին սիմբիոզ կեցություն ունեցող հանցակից, կամ հանցանքներին լոյալ բազմաթիվ շահային խմբեր:

Այս պարագայում չի կարելի հեշտացնել վերոգրյալ անձ-կուսակցությունների և շահային խմբերի ԱԺ հայտնվելու հավանականությունը՝ նվազեցնելով նվազագույն շեմը և ավելացվելով իրավունքի ուժով խորհրդարան թափանցելու շանս ունեցողների թիվը: Սա կխանգարի և կկարճի լուծարվողների լուծարումը, խոշորացման գնացողների կոնսենսուսը, նորերի թռիչքային մասնագիտացումը, հների ռեբրենդինգը: Ստացվեց վտանգվում է քաղաքական որակյալ մշակույթի արագ ձևավորման գործընթացը: Այս դեպքում ինչու՞ է Նիկոլ Փաշինյանը ցանկանում, որ բարեփոխված տարբերակը ընդունվի: Քանի որ սա ժողովրդի վստահությունը վայելող Վարչապետի միակ առաջարկվելիք փոխզիճումն է որոշ ուժերին լոյալ քաղաքականության դիմաց: Եթե վաղը կրկին տապալվի այս օրենքի ընդունումը, առաջին ուրախացողը լինելու է Վարչապետ Նիկոլ Փաշինյանը:

Այդ դեպքում ինչու՞ է ՀՀԿ-ն այդքան ջանասիրաբար տապալում այդ գործընթացը: Քանի որ ՀՀԿ-ն, այլևս չունենալով քաղաքական ռեսուրս կարճաժամկետ կտրվածքում մուտք գործելու ակտիվ քաղաքականություն, հաշտվել է իր պարտության հետ և չի կարող որևէ կերպ խոչընդոտել ժողովրդի իշխանությանը ավարտին հասցնելու «Թավշյա» հեղափոխությունը (Կարծում եմ հիմա արդեն չեն էլ ցանկանա խանգարել): Փոխարենը ՀՀԿ-ն փորձում է «պատժել» նախկին գործընկերներին երկդեմ Յանուսի քաղաքականության համար:

Վերջում հարկ է նշել, որ նոր Ընտրական Օրենսգիրքը պետք է գրել մեկ տարվա ընթացքում, որ ավելի որակյալ, հեղափոխական ուրիշ օրենսգիրք ունենանք, այլ ոչ թե գործողի բարեփոխված տարբերակը: Նոր Ընտրական օրենսգիրքը պետք է ընդունվի նոր, 7-րդ գումարման, ժողովրդի վստահությունը վայելող, լեգիտիմ Ազգային Ժողովի կողմից: Հ.Գ. Հուսանք, վաղը կրկին կբոյկոտեն և կտապալեն առաջարկվող Ընտրական օրենսգիրքը ու երկու օր անց ԱԺ-ն իրավունքի ուժով կլուծարվի:

Գուրգեն Սիմոնյան. Facebook