Ինտերնետից օգտվողների շրջանում առկա է գրագիտության ցածր մակարդակ. Սամվել Մարտիրոսյան

«Ինտերնետ կառավարումը կայուն և ներառական զարգացման համար» թեմայով համաժողովում տեղեկատվական անվտանգության փորձագետ Սամվել Մարտիրոսյանը նշել է համացանցում գրագիտության պակասի մասին:

«Բնակչության մեծ մասը չի պատկերացնում այն խնդիրները, որոնց կարող է բախվել ինտերնետում` սկսած երեխաների հետ կապված խնդիրներից, վերջացրած կիբեռանվտանգության հարցերով: Գրագիտության բարձրացման տեսանկյունից արվող աշխատանքը բավարար չէ: Խնդիրը բազմաշերտ է, պետք է կրթել դպրոցներում, բուհերում, դրանից բացի կան ահռելի քանակով մարդիկ, ովքեր այդ հնարավորությունը չունեն: Ինչ անեն այն մարդիկ, ովքեր արդեն մեծ են, դպրոցական, բուհական տարիքից դուրս են: Այսինքն` ազգային մակարդակով ծրագրեր պետք է իրականացվեն»,- ասել է Սամվել Մարտիրոսյանը:

Ինտերնետ գրագիտությունից բացի, օրենսդրական դաշտի հետ կապված խնդիրներ կան: Սամվել Մարտիրոսյանի խոսքով, օրինակ, ինտերնետ առևտուրն աճում է շատ արագ, բայց օրենսդրությունը չի հասնում դրա հետևից:

Իր հերթին ՀՀ ոստիկանության կիբեռհանցագործությունների բաժնի պետ Վահագն Հարությունյանը հայտնել է.

«Կիբեռանվտանգության հետ կապված՝ իրականացվում են մի շարք միջոցառումներ, որոնք նպաստում են համացանցից օգտվելն առավել անվտանգ դարձնելուն: Կանխարգելման նպատակով հիմնականում իրազեկման աշխատանքներ են կատարվում, որ քաղաքացիները տեղյակ լինեն, թե ինչպես օգտվել, ինչ անել հանցագործների զոհ չդառնալու համար»,-ասաց Վահագն Հարությունյանը: