Գարեգին Երկրորդն ընդունել է ԱՄՆ Կոնգրեսի Ներկայացուցիչների պալատի պատվիրակությանը
Սեպտեմբերի 20-ին Ն.Ս.Օ.Տ.Տ. Գարեգին Երկրորդ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Ամերիկայի Միացյալ Նահանգների Կոնգրեսի Ներկայացուցիչների պալատի պատվիրակությանը` ուղեկցությամբ ՀՀ Ազգային ժողովի փոխխոսնակ Արփինե Հովհաննիսյանի և ԱՄՆ-ում Հայաստանի Հանրապետության արտակարգ և լիազոր դեսպան Գրիգոր Հովհաննիսյանի: Պատվիրակության կազմում էին Կոնգրեսի հայկական հարցերով հանձնախմբի համանախագահ Ֆրենկ Փալոնը, կոնգրեսականներ Ջեյմս Սենսենբրեները, Ջեքի Սփիերը, Աննա Էշուն, Թալսի Գաբարդը:
Ամենայն Հայոց Կաթողիկոսն իր գնահատանքը փոխանցեց ԱՄՆ իշխանություններին, իբրև ԵԱՀԿ Մինսկի խմբի համանախագահող երկիր, Լեռնային Ղարաբաղի հակամարտության խաղաղ կարգավորմանն ի նպաստ ներդրվող հետևողական ջանքերի համար:
Ամենայն Հայոց Կաթողիկոսը, անդրադառնալով Հայոց ցեղասպանության ճանաչման ու դատապարտման գործընթացին, կարևորեց այդ ուղղությամբ գործադրվող ջանքերը` պատմական արդարության վերականգնումով մարդկային կյանքում այսուհետ նմանօրինակ ողբերգությունների կանխարգելման առումով: