Ապստամբություն «Ծառուկյան դաշինքում»
Այն, ինչ երկու օր էլ տեղի է ունենում նորընտիր խորհրդարան անցած «Ծառուկյան դաշինքում»՝ ապստամբություն է: Երեկ երեկոյան արդեն պարզ դարձավ, որ «Ծառուկյան դաշինքից» ԱԺ անցած թե՛ ռեյտինգային, թե՛ համապետական ցուցակով բավական մեծ քանակությամբ պատգամավորներ «իրենց» դիմումի համաձայն հրաժարվում էին պատգամավորի մանդատից: Սակայն, երբ ԶԼՄ-ների ներկայացուցիչները համապատասխան հարցադրումներով դիմել էին իրենց մանդատներից «ինքնակամ» հրաժարվողներին պարզվել էր, նրանցից շատերը այդ ամսին տեղեկացել են ԶԼՄ-ներից և բացարձակ մտադրություն չունեն հրաժարվելու պատգամավորության լիազորություններից...Այսինքն,շատերի անունից ինքնաբացարկի դիմումները կեղծիք են:
Սա արդեն աննախադեպ էր և իր հետևանքներն էր ունենալու:
Իսկ այդ հետևանքներն իրենց երկար սպասել չտվեցին: «Ծառուկյան դաշինքից» «ինքնաբացարկ» հայտնած 23 պատգամավորներից 12 վերականգնեցին իրենց ոտնահարված իրավունքները և շատերը ի հեճուկս Գագիկ Ծառուկյանի կհայտնվեն ԱԺ-ում: Սա առաջին կոնֆլիկտն էր «Ծառուկյան դաշինքում», որը տեղի ունեցավ 7-րդ գումարման ԱԺ-ի առաջին նիստից առաջ և որը հավանական է դառնա դաշինքի պառակտման պատճառ...
«Ծառուկյան դաշինքի» ղեկավարության գլխավոր սխալներից մեկը կարելի է համարել ռեյտինգային ցուցակներում առաջատար դիրք զբաղեցրած թեկնածուներին խաղից դուրս բերելը և յուրայիններին,որոնք անհամեմատ ավելի քիչ ձայներ էին բերել դաշինքին, ԱԺ մտցնելու փորձերը: Կային թեկնածուներ,որոնք չըմբոստացան դաշինքի ղեկավարի այս որոշման դեմ: Բայց եղան նաև նրանք, ովքեր բացահայտ մեղադրեցին վերջինիս իրենց անունից կեղծ ինքնաբացարկ ներկայացնելու մեջ և վերականգնեցին իրենց իրավունքները ԿԸՀ-ի մի քանի ժամ առաջ տեղի ունեցած նիստում: Ռեյտինգային թեկնածուները շատ լավ գիտեն իրենց արժեքը և սպասելի էր նրանց կողմից այսպիսի արձագանքը:
Այլ հարց է այն թեկնածուների ոգևորությունը,որոնք անցել են «Ծառուկյան դաշինքի» համապետական ցուցակով և շատ լավ գիտեն, որ ունենալով 0,1% վարկանիշ երբեք ԱԺ-ում չէին հայտնվի, եթե չլիներ Գագիկ Ծառուկյանը: Բայց խնդիրը նրանում է, թե ինչու՞ հասարակության մոտ վարկանիշ չունեցող այս անձինք հայտնվեցի «Ծառուկյան դաշինքի» ցուցակում, որ հիմա էլ նրանցից փորձում են ձերբազատվել, իսկ վերջիններս էլ ընդդիմանում են:
«Ծառուկյան դաշինքի» շուրջ տեղի ունեցող այս իրադարձությունները վարկաբեկում են այս քաղաքական ուժին,որը դեռ ԱԺ-ում չհայտնված արդեն պառակտվել է:
Գագիկ Համբարյան. Ֆեյսբուք: