Ես չեմ ցանկանում կորցնել ժողովրդի պուլսը. Արմեն Ամիրյան

Ինչպես հայտնել էինք, ՀՀ մշակույթի նորանշանակ նախարար Արմեն Ամիրյանը մշտական բնակության իրավունք («Գրին քարտ») ունի ԱՄՆ-ում։ Նորանշանակ նախարարի առաջիկա ծրագրերի, և ԱՄՆ-ում բնակություն հաստատելու մտադրությունների և նախարար դառնալու ցանկության մասին Operativa.am-ի թղթակիցը զրուցել է Արմեն Ամիրյանի հետ:

-Պարո՛ն Ամիրյան, կմատնանշե՞ք մշակութային կյանքում այն լուրջ բացը, որն առաջնահերթ բարեփոխման կարիք ունի:

-Մատնանշել ամենակարևոր և լուրջ բացը շատ դժվար է, քանի որ բոլոր ուղղություններով աշխատանք տարվել է, բայց հիմա զարգացման վեկտորներն ենք մենք ուզում փոխել: Փոխվում է ապագայի հանդեպ մեր պատկերացումները մշակույթի ոլորտում և պետք է լուրջ ուշադրություն դարձնել բոլոր ուղղություններով:

-Ո՞րն է առաջին քայլը, որը ձեռնարկել եք այս ոլորտում:

-Վաղն այցելություն ունեմ գրահրատարակչական ոլորտի մի քանի ներկայացուցիչների մոտ՝ հրատարակչությունից սկսած մինչև գրախանութ: Փորձելու ենք իրականացնել ան գաղափարը, որի մասին առաջին իսկ օրվանից խոսել եմ. այն է՝ նոր տիպի գրախանութների ստեղծում, որը դառնալու է ամբողջական ցիկլ գրահրատարակչական ոլորտի զարգացման համար՝ սկսած գրողից մինչև գնորդ, ընթերցող: Այդ գրախանութները դառնալու են ընտանեկան ժամանցի, հանգստի վայրեր, այնպես, ինչպես մենք ընտանիքով այցելում ենք կինոթատրոններ: Ապագայի ծրագրերի իրականացման մեջ շատ կարևոր է մամուլի դերակատարությունը, որպեսզի մենք կարողանանք հասարակության արձագանքներին հետևել: Երբեմն ամենօրյա աշխատանքի մեջ մենք կորցնում ենք ժողովրդի պուլսը: Ես չեմ ուզում կորցնել և ակնկալում եմ մամուլի աջակցությունը:

-Երբևէ մտածե՞լ էիք Մշակույթի նախարարի պաշտոնը զբաղեցնելու մասին:

-Ես իմ ամբողջ կյանքում ծառայել եմ մշակույթին: Շատ փոփոխություն չի եղել իմ կյանքում, պարզապես, մշակութային քաղաքականության խնդիրն է ավելացել և նաև մշակույթի զարգացման ապագայի տեսլականը: Լավագույն ուժերը համախմբելու դեպքում հնարավորություն է լինելու հասնել մեծ հաջողությունների:

-Գիտենք, որ ԱՄՆ-ում մշտական բնակություն հաստատելու մշտական իրավունք ունեք: Մտածե՞լ եք արդյոք հայրենիքը լքելու մասին:

-«Գրին քարտ»-ի համար ես  ոչ թե դիմել և ստացել եմ, այլ՝ այն ինձ շնորհվել է: Ես ունեմ այն դեռևս 2008 թվականից: 1995 թվականից ներդրումներ եմ կատարել ԱՄՆ-ում, սակայն մինչ այսօր ես ապրում եմ իմ հայրենիքում և ծառայում իմ ժողովրդին:

-Բացասական կարծիքներ լսե՞լ եք Ձեր՝ Մշակույթի նախարար նշանակվելու հետ կապված:

-Կարող են լինել նաև բացասական կարծիքներ, ես դա ևս դրական եմ համարում: Աշխարհում ամեն բան հարաբերական է, և հենց այդ հարաբերական լինելն է, որ գեղեցիկ է դարձնում մեր կյանքը: Այնպես որ, բացասականը մեզ մղում է ավելի լավ, նոր գործերի: Մենք չենք վախենում քննադատություններից, հակառակը՝ այն մեզ մղում է ավելի ճիշտ տեսնել ապագան և ավելի ճիշտ քայլեր անել: