Իմ սիրտ տանող ճանապարհն այնքան էլ հեշտ չէ անցնել. երգչուհի Մարիաննա (լուսանկարներ)

2015 թվականն իր տեղը զիջելուց առաջ երգչուհի Մարիաննայի կյանքը նշանավորել է մի քանի իրադարձությամբ: 2015թ.-ին լույս տեսավ նրա առաջին ձայնասկավառակը, ինչպես նաև նա կրկին սկսել է աշխատել իր մասնագիտությամբ: Վերջինս իրավաբան է:

Operativ.am-ի թղթակիցը զրուցել է երգչուհու հետ և մի քանի գաղտնիք իմացել նրա՝ ինչպես ստեղծագործական, այնպես էլ անձնական կյանքից:

Ինչպիսի՞ն էր 2015 թվականը Ձեզ համար: Կարողացա՞ք հասցնել իրականացնել բոլոր ծրագրերը:

2015 թվականն ինձ համար ստեղծագործական առումով հաջողակ տարի եմ համարում: Թողարկվեց երկար սպասված իմ առաջին ձայնասկավառակը, ինչպես նաև սկսեցի կրկին զբաղվել իրավաբանությամբ: Չնայած շատ ծրագրեր ունեի 2015 թվականի հետ կապված, որոնք չեմ հասցրել իրականացնել, բայց հուսով եմ, որ այս տարի կկարողանամ հետաքրքիր նորություններով ներկայանալ իմ երկրպագուներին:

Իսկ ո՞ր մասնագիտությունն է առավել հոգեհարազատ Ձեզ՝ երգը,  թե՞ իրավաբանությունը:

Իրականում, երկու մասնագիտությունս էլ ինձ դուր է գալիս, բայց երգն ինձ համար ավելի հոգեհարազատ է: Այն ինձ համար առաջնային տեղ է զբաղեցնում:

Քանի՞ տարեկանից եք երգում:

Շատ փոքր հասակից եմ երգում: 4 տարեկանից երգել ու պարել եմ «Ակունք» ազգագրական երգի և պարի համույթում: 7 տարեկանից արդեն սովորել եմ նաև «Արևիկ» անսամբլում:

Ի՞նչ եք ակնկալում 2016 թվականից:

Առաջիկա ծրագրերս շատ են. նոր երգեր, տեսահոլովակ, հնարավոր է նաև մեկ այլ ժանրի երգ ներկայացնեմ: Չեմ սիրում նախապես բարձրաձայնել, բայց նորություններ անպայման կլինեն:

Կմտաբերե՞ք Ձմեռ պապի նվիրած այն նվերը, որն ամենաշատն է Ձեզ դուր եկել մինչ այժմ, և ի՞նչ նվիրեց նա Ձեզ այս տարի:

Անկեղծ ասած, հիմա չեմ կարողանում հիշել, շատ տարբեր նվերներ եմ ստացել: Ձմեռ պապիկն ինձ համար միշտ բերել է այն, ինչ ես ցանկացել եմ: Այս տարի օծանելիք  և ապարանջան բերեց ինձ համար:

Ի՞նչ եք երազում, որին պատրաստ եք ամեն գնով հասնել:

Ինչպես բոլորը՝ ես ևս, նպատակներ ու երազանքներ շատ ունեմ, բայց չեմ ցանկանում բարձրաձայնել: Աստծո կամոք կիրականանան իմ երազանքները:

Մարիաննայի սիրտն ազա՞տ է, և ինչպիսի՞ն պետք է լինի այն տղամարդը, ում կհաջողվի գրավել Ձեր սիրտը:

Այո, իմ սիրտն ազատ է: Հատուկ սահմանված չափանիշներ չունեմ, բայց եթե անկեղծ լինեմ, իրականում, իմ սիրտ տանող ճանապարհն այնքան էլ հեշտ չէ անցնել:

Ի՞նչ կմաղթեք հայ ժողովրդին:

Սրտանց շնորհավորում եմ իմ հայ ազգի Ամանորն ու Սուրբ ծնունդը: Մաղթում եմ անսահման սեր, առողջություն և երջանիկ պահերով լի տարի: 

Operativ.am-ը շնորհավորում է երգչուհուն և մաղթում բուռն ստեղծագործական կյանք: