Երգչուհի Արփինե Բեկջանյանի ֆեյսբուքյան ընկերներից ոմանք դարձել են երգչուհու մտերիմները

2014 թվականն իր տեղը զիջեց 2015 թվականին: Ոմանց համար 2014-ը հաջողակ, իսկ ոմանց համար պարզապես սովորական տարի էր: Operativ.am-ի թղթակիցն Ամանորի հետ կապված երազանքների, մտադրություների ու նախասիրությունների մասին զրուցել է երգչուհի Արփինե Բեկջանյանի հետ:

-Ո՞րն է 2014-ի Ձեր ձեռքբերումը:
Ես կասեի ձեռքբերումները: Նախ ֆեյսբուքյան երկրպագուներիցս որոշ մարդիկ դարձան իմ լավ ընկերները: Նրանք անակնկալ քայլ արեցին՝ գալով իմ աշխատավայր՝ շփումը դարձնելով կենդանի: Ծանոթացա նաև այլ հաճելի մարդկանց հետ:

-Ամանորյա Ձեր ամենասիրած նվերը:
Ինձ համար ամենասիրված նվեր կարող է դառնալ սրտանց նվիրված նույնիսկ մեկ մազակալը:

-Որտե՞ղ և ու՞մ հետ եք սիրում դիմավորել Ամանորը:

Սիրում եմ դիմավորել ընտանիքիս հետ և շարունակել ընկերներիս հետ:

-Հավատու՞մ եք Ձմեռ պապիկին:

Վաղուց չեմ հավատում, բայց հրաշքներին հավատում եմ:

-Հայաստանում ինչպե՞ս կցանկանայիք նշվեր Ամանորը:
Կուզենայի Հայաստանն օրինակ վերցներ արտերկրից. ուրախանային հաճելի մարդկանց  ընկերակցությամբ՝ գտնվելով հաճելի միջավայրում, ոչ թե պարտքով առևտուր անեն, հոգնեն խոհանոցում, հյուր ընդունեն ճանապարհեն և մտքում հայհոյեն Նոր տարին:

-Ի՞նչ եք ակնկալում 2015-ից:

2015-ից ակնկալում եմ հաջողություններ, նորանոր ձեռքբերումներ և կարիերայում առաջընթաց:

-Ամանորյա Ձեր սիրած կերակուրը:
Անտարբեր եմ սննդի նկատմամբ, սակայն կառանձնացնեմ խաղողի թփով տոլման՝ պատրաստված մամայիս ձեռքով:

-Ի՞նչ չհասցրիք իրականացնել 2014-ին:

Չհասցրի ձայնագրել նոր երգերս և նկարահանել տեսահոլովակ: Ցավոք, զբաղվածությունս թույլ չտվեց:

-Ի՞նչ կմաղթեք հայ ժողովրդին:

Ժողովրդին կմաղթեի փոքր-ինչ բարություն, լավատեսություն, կամեցողություն: Գնահատող լինեն, առողջ  լինեն, չունենան ֆինանսական ճգնաժամ: Երկրիս՝ խաղաղություն, զինվորներ չմահանան, վթարներ չլինեն: Բոլորին մեծ սեր:

-Երազանք, որ դեռևս չի կատարվել:
Դրանց մասին չեմ ուզում խոսել, հենց կատարվի՝ կտեղեկանանք:

-Ո՞վ է Ձեր Ձեռ պապիկը:

Իմ Ձմեռ պապիկը ես եմ, մեկ- մեկ էլ ամուսինս՝ իր անակնկալներով:

-Գույներ, որ Ձեզ Ամանոր են հիշեցնում:

Կանաչ, ոսկեգույն:

-Եթե Ձմեռ պապիկ լինեիք….

Հիվանդանոցում պառկած երեխաներին կայցելեի նվերներով ու զորությամբ, որ շուտ առողջանային:

-Յուրաքանչյուր Նոր տարի ի՞նչն է, որ մշտապես Ձեր սեղանին է:
00:00-ին վառվող երկու մոմ:

-Ո՞րն է Ձեր ամենասիրելի տոնը:
Նոր տարին, որի հետ նոր հույսեր ու  պլաններ ենք կապում: Սիրում եմ նաև Սուրբ Վալենտինի տոնը, քանի որ օդում սիրո բույրն է ճախրում: Երջանիկ ու սիրով լի զույգերն ավելի են արտահայտում իրենց զգացմունքները՝ գուցե և արտահայտում չարտասանված խոսքեր. «Ես սիրում եմ քեզ»: 

 ***

Երգիչ Mister X-ի հարցը՝  երգչուհի Արփինե Բեկջանյանին. (երգիչը չգիտեր, թե ում է ուղղված հարցը):

-Եթե հանդիպեք Ձմեռ պապիկին, ի՞նչ կհարցնեք:

Արփինե Բեկջանյան. Կտանե՞ք ինձ Ձեզ հետ դեպի հեքիաթ:

Operativ.am-ը շնորհավորում է երգչուհուն  և մաղթում հաջողություններ:

Կարինե Գևորգյան