Տուրիզմի հիմնադրամը կմիանա կոմիտեին, կվերակազմավորվի «Բիզնես Արմենիա»–ն. Տիգրան Խաչատրյան
Միավորման և վերակազմավորման որոշումները կայացվել են, կառույցների արդյունավետությունը բարձրացնելու համար։ Այսօր՝ փետրվարի 8-ին, լրագրողների հետ զրույցում նշեց Տնտեսական զարգացման և ներդրումների նախարար Տիգրան Խաչատրյանը: «Մենք որոշել ենք, որ տուրիզմի հիմնադրամը կմիավորվի տուրիզմի կոմիտեին, որովհետև, երբ վերլուծում ենք գործառույթները, որ փաստացի իրականացվում են այդ երկու կառույցներում, դրանք բովանդակությամբ էապես տարբեր չեն, և իրենց համատեղ կառավարումը կտա նաև ռեսուրսների և սահմանված թիրախներին հասնելու ջանքերի որոշակի արդյունավետություն: Այսինքն, այդտեղ մենք երկու կարծիք չունենք. Մենք կարծում ենք որ ճիշտ ճանապարհով ենք գնում»,– ասաց նա։
Ըստ նախարարի՝ ճիշտ չէ ասել, թե «Բիզնես Արմենիա»–ն վերանում է. ««Բիզնես Արմենիա»–ն չի վերանում, այլ անցնում է վերակառուցման ճանապարհ: Այսուհետ, կա արդեն նոր նշանակված տնօրեն բիզնես կառույցի, և առաջիկայում տնօրենը կներկայացնի իր տեսակետները, թե ինչպես պետք է մոբիլիզացնել առկա ռեսուրսները, դրանք համալրել նոր, թարմ մարդկանցով և գաղափարներով՝ առաջիկայում ունենալով մեկ կարևոր նպատակ. բոլոր ռեսուրսները պետք է օգտագործվեն առավել խոշոր և նշանակալից ծրագրերի իրականացման ուղղությամբ»,– ասաց նա:
Այդ ճանապարհին, Խաչատրյանի խոսքով, որևէ կարևոր գործառույթ, որ մինչ այս իրականացվել է «Բիզնես Արմենիա»–ի կողմից դուրս չի մնալու: «Մենք, ընդամենը վերակազմակերպելով այդ գործառույթներն իրականացնելու ձևաչափը, դրանք իրականացելու ենք այլ այնպիսի ստորաբաժանումների և կառուցվածքային միավորների ձևաչափում, որոնք պատասխանատու կլինեն նոր գործառույթների իրականացման համար ՝ ուղղակի չեն կոչվի «Բիզնես Արմենիա»–ի ստորաբաժանում, կարող է կոչվեն նախարարության ստորաբաժանում»,– ասաց նա: