Շիրակում ավելացել են մեքենաներից կատարված գողությունները. մարզի դատախազը կոնկրետ խնդիրներ է առաջադրել ոստիկանությանը
Շիրակի մարզում ավելացել են ավտոմեքենաներից կատարված գողությունները. մարզի դատախազը կոնկրետ խնդիրներ է առաջադրել ոստիկանությանը։
Մարզի դատախազությունում ուսումնասիրվել են 2018թ. ընթացքում մարզի վարչական տարածքում արձանագրված ավտոմեքենաներից կատարված հափշտակության դեպքերը: Պարզվել է, որ քննարկվող ժամանակահատվածում մարզի տարածքում կատարվել է 70 գողություն և 1 գողության փորձ։
Ընդ որում՝ միայն Գյումրի քաղաքում արձանագրվել է նման 64 գողության և մեկ գողության փորձի դեպք, ինչը կազմում է մարզի տարածքում ավտոմեքենաներից կատարված ընդհանուր գողությունների 91,5%-ը:
Նշված դեպքերի մեծ մասի պարագայում քրեական գործեր չեն հարուցվել՝ բողոքի բացակայության պատճառով, իսկ հարուցված քրեական գործերի ճնշող մեծամասնության վարույթը կասեցվել է՝ քրեական պատասխանատվության ենթակա անձը հայտնի չլինելու հիմքով։ Նման իրավիճակը խոսում է այն մասին, որ արձանագրված գողությունները հիմնականում մնում են չբացահայտված, և հնարավոր չի դառնում հանցագործությունները կատարած անձանց ենթարկել քրեական պատասխանատվության։
Դատախազությունում կատարված վերլուծությունից հետևում է, որ այն դեպքերում, երբ նախապատրաստված նյութերով քրեական գործի հարուցումը մերժվել է դիմողի բողոքի բացակայության հիմքով՝ այլևս անհրաժեշտ հետևողականություն և ջանասիրություն չի ցուցաբերվել հանցագործությունը կատարած անձանց հայտնաբերելու, համապատասխան հաշվառման վերցնելու, նրանց հետ պրոֆիլակտիկ աշխատանքներ տանելու, այլ հանցագործությունների կատարմանը նրանց մասնակից լինելու հնարավորության հարցը պարզելու ուղղությամբ, ինչը հանցագործությունների նախականխման կարևոր երաշխիքներից են:
Գողությունների գերակշիռ մասը կատարվել է գիշերային ժամերին: Որպես հանցագործության թիրախ հիմնականում ընտրվել են հակաառևանգման ազդանշանային համակարգ չունեցող, կայանված վայրերում տեսաձայնագրող սարքեր չունեցող, հսկողությունից դուրս մնացած ավտոմեքենաները։
Հանցագործությանը նպաստող պայմաններից են տարածաշրջանի ազգաբնակչության զբաղվածության ցածր մակարդակը, սոցիալական ոչ բարվոք պայմանները, նախկինում դատապարտված կամ քրեածին հակում ունեցող անձանց նկատմամբ ոչ բավարար հսկողություն և պրոֆիլակտիկ-կանխարգելիչ աշխատանքներ իրականացնելը: Կարևոր պաատճառներից է նաև քաղաքացիների կողմից իրենց ավտոմեքենաները ոտնձգություններից պաշտպանելու ուղղությամբ բավարար միջոցներ չձեռնարկելը, որն արտահայտվում է հաճախ դռները չկողպելով, հնարավորության դեպքում անվտանգության ազդանշանային համակարգով չկահավորելով, երկար ժամանակով մեքենան առանց հսկողության թողնելով և այլն։
Նկատի ունենալով, որ նման հանցագործությունների թվի աճի պայմաններում հարկավոր է բարձրացնել ինչպես կանխարգելման, այնպես էլ բացահայտման ուղղությամբ ձեռնարկվող միջոցառումների որակն ու արդյունավետությունը՝ Շիրակի մարզի դատախազ Կարեն Գաբրիելյանը միջնորդագիր է ներկայացրել ՀՀ ոստիկանության Շիրակի մարզային վարչության պետ Ս.Քոչարյանին: Մարզի դատախազը շեշտել է մասնավորապես ավտոմեքենաներից կատարված գողությունների դեմ պայքարում իրականացվող կանխարգելիչ աշխատանքներն ակտիվացնելու, պարեկապահակետային վերակարգերի ավելի թիրախային տեղաբաշխում կատարելու, ավտոմեքենաներից կատարված գողության համար առավել կրիմինոգեն վայրերն ուշադրության տակ պահելու, գողության կամ համասեռ հանցագործության կատարման համար նախկինում դատված անձանց մշտական օպերատիվ տեսադաշտում պահելու, արձանագրվող դեպքերի բացահայտման և հանցագործություն կատարած անձանց հայտնաբերման գործընթացներում տեղ գտած թերությունները, բացթողումները վերացնելու խիստ անհրաժեշտությունը:
Ստեղծված իրավիճակը, ինչպես նաև մարզի դատախազության կատարած ուսումնասիրության արդյունքներն առաջիկայում կդարձվեն համատեղ քննարկման առարկա՝ շահագրգիռ բոլոր կառույցների ներգրավմամբ: