Արոնյանն Արագ շախմատի ԱԱ առաջին տուրում պարտվել է Ռոբերտ Հովհաննիսյանին
Սանկտ-Պետերբուրգում մեկնարկել է տղամարդկանց արագ շախմատի աշխարհի առաջնությունը, որին մասնակցում է 40 երկրի 206 շախմատիստ:
Մասնակիցների թվով Հայաստանի պատվիրակությանը 3-րդն է: Ավելի շատ մասնակիցներ հայտավորել են միայն առաջնությունն ընդունող Ռուսաստանը և Իսրայելը, գրում է Հայաստանի շախմատային ֆեդերացիայի պաշտոնական կայքը:
Երեկ կայացել են մրցաշարի 1-5-րդ տուրերը և մեկնարկային հենց առաջին օրը գրանցվել են բազմաթիվ անակնկալներ:
Առաջնությունը պարտությամբ է մեկնարկել հայկական շախմատի առաջատար Լևոն Արոնյանը: Մեկնարկային տուրում Արոնյանը պարտվել է Հայաստանի հավաքականի անդամ Ռոբերտ Հովհաննիսյանին: Հետո Արոնյանը տոնել է երեք հաղթանակ և ոչ-ոքի խաղացել Ադամ Թուխաևի հետ:
Մրցաշարը երկու պարտությամբ է մեկնարկել աշխարհի չեմպիոն Մագնուս Կարլսենը. առաջին տուրում չեմպիոնը, ունենալով մեծ առավելություն, սպառել է ժամանակը և պարտություն կրել Ադամ Թուխաևից:
Երկրոդ տուրում Կարլսենը, կրկին ունենալով առավելություն, սխալներ է թույլ տվել և պարտվել Ուզբեկստանը ներկայացնող 16-ամյա շախմատիստ Վոհիդով Շամշիդինին:
Երկու պարտությունից հետո սակայն նորվեգացին երեք հաղթանակ է տարել և դեռ պահպանում է չեմպիոնի կոչումը նվաճելու շանսեր:
5 տուրից հետո աղյուսակը գլխավորում են Ռուսաստանը ներկայացնող Յան Նեպոմնյաշչին, Դմիտրի Անդրեյկինը և 15-ամյա Իրանի ներկայացուցիչ Ֆիրուզա Ալիռեզան:
Հայաստանի ներկայացուցիչներից Լևոն Արոնյանը, Գաբրիել Սարգսյանը, Վլադիմիր Հակոբյանը, Տիգրան Պետրոսյանը և Ռոբերտ Հովհաննիսյանը վաստակել են 3.5-ական, Հրանտ Մելքումյանը՝ 2, Արամ Հակոբյանը և Վահե Դանիելյանը՝ 1-ական միավոր:
Այսօր տեղի կունենան 6-10-րդ տուրերը: 6-րդ տուրում հայկական շախմատի առաջատարները՝ Լևոն Արոնյանը և Գաբրիել Սարգսյանը կմրցեն միմյանց դեմ:
Մրցաշարը բաղկացած է 15 տուրից և անցկացվում է դեկտեմբերի 26-28-ը: Յուրաքանրյուր խաղային օր տեղի կունենա 5 տուր: