Բժշկական համալսարանում Նարեկ Վանեսյանի վարքի պատճառը իմ այնտեղ գտնվել-չգտնվելու իրավունք չէր, նա այլ հիմքեր ունի. ԵՊԲՀ միջադեպի մասնակից
Երևանի Մ. Հերացու անվան պետական բժշկական համալսարանի «Բուժհաստատությունների կառավարում» մագիստրոսական ծրագրի առաջին շրջանավարտներին դիպլոմներ հանձնելու և քիմիայի ոլորտում Նոբելյան մրցանակակիրներ Բեն Ֆերինգանի և Ֆրեյզեր Ստոդդարտի՝ պատվավոր դոկտորների կոչման շնորհման հանդիսավոր արարողության ժամանակ գրանցված միջադեպը գուցե այլ հիմքեր ունի, սակայն դա իմ այնտեղ գտնվել-չգտնվելու իրավունքի հետ առնչություն չունի:
Այս մասին Tert.am-ի հետ զրույցում ասաց «Մենեջմենթ միքս» ՍՊԸ-ի ադմինիստրատիվ տնօրեն, Բժշկական համալսարանի հետ համատեղ անցկացվող «Բուժհաստատությունների կառավարում» մագիստրոսական ծրագրի իրականացնող, դասախոսի ասիստենտ Դավիթ Գրիգորյանը (լուսանկարում՝ ձախից):
Դիտարկմանը, թե Հոգեկան առողջության պահպանման կենտրոնի տնօրեն, շրջանավարտ՝ Նարեկ Վանեսյանը պնդում է, որ Դավիթ Գրիգորյանն իրավունք չի ունեցել գտնվել հարթակին ու լուսանկարվել շրջանավարտների հետ, մինչդեռ Բժշկական համալսարանը հակառակն է պնդում, իրականում ինչո՞ւ է տեղի ունեցել միջադեպը, Դավիթ Գրիգորյանն ասաց.«Իրավունքի հետ կապված ասեմ, որ մենք ինքներս մեզ իրավունք ենք վերապահել նախաձեռնելու այս ծրագիրը և ԵՊԲՀ-ի հետ համատեղ իրականացնել այն, և շրջանավարտների ավարտական օրը որոշել են լուսանկարահանում իրականացնել շրջանավարտների հետ: Որևէ մեկը մեզ չի կարող զրկել այդ իրավունքից»:
Ինչ վերաբերում է իր դասախոս չլինելուն, ինչի մասին պնդել է Նարեկ Վանեսյանը, Դավիթ Գրիգորյանն ասաց.«Ես դասախոսական անձնակազմի անդամ եմ, դասախոսի ասիստենտ եմ, ամբողջ կուրսի ու ծրագրի համակարգման և ստեղծման թիմի անդամ, իրենց հետ նաև դասերի եմ մասնակցել որպես դասախոսի ասիստենտ, և լինելով ղեկավար այն ընկերության, որը ԵՊԲՀ-ի հետ իրականացնում է ամբողջ մագիստրոսական կուրսը:
Իհարկե, ես կհպարտանամ ինձ այդ օրը այդպես պահելու համար»:
Դասախոսի ասիստենտը նշեց, որ ինքը չի պնդում, սակայն կարծում է, որ Վանեսյանի վարքը պայմանավորված է ինչ-որ այլ պատճառով, ոչ թե իր այնտեղ գտնվել-չգտնվելու իրավունքով.«Ես չեմ պնդում, բայց միջադեպի հիմքերը պետք է գուցե այլ տեղ փնտրել, բայց դա հաստատ իրավուքնի դաշտում չէ»: