«Ֆեյսբուքն» ուսումնասիրելով՝ տպավորություն էր ստեղծվում, թե ես քաղաքում չունեմ վարկանիշ, այնինչ ընտրություններն այլ պատկեր ցույց տվեցին. Էջմիածնի քաղաքապետ

Էջմիածնի նորընտիր քաղաքապետ Դիանա Գասպարյանը նախկինում երբեք չի մտածել, որ ինքը երբևէ կդառնա քաղաքապետ։

«Երբեք չեմ մտածել, առհասարակ ես քաղաքականապես ակտիվ եմ եղել, բայց ինձ պատկերացրել եմ ամեն տեղ, բացի ՏԻՄ-ից»,- Ազատության ֆեյսբուքյան ասուլիսի ժամանակ ասաց Գասպարյանը։

Վերջինս անդրադարձավ նաև մինչև ընտրությունները տարածված տեսանյութին, որտեղ նրա հայրը սպառնում էր կոտրել Գևորգ Մանուկյանի ոտքերը։ Քաղաքապետը շեշտեց՝ միջադեպն իսկապես տգեղ է եղել, բայց հավելեց, որ շատ բան այլ լույսի ներքո է ներկայացվել։

«Ե՛վ իրավաբանական իմաստով, և՛ սպառնալիքի իմաստով ես այստեղ չեմ տեսնում հանցակազմի հատկանիշներ, որովհետև սպառնալիք որակվելու համար պետք է՝ այն լինի իրական։ Սակայն ակնհայտ է, որ հայրս Ֆրանսիա չէր հասնելու, որևէ մեկի ոտքերը չէր կոտրելու, սա արտահայտություն է, որն անհաջող է։ Ես արդեն դատապարտել եմ այդ քայլը, մի քանի անգամ ներողություն խնդրել պարոն Մանուկյանից։ Իրականում դեպքը մի քիչ այլ կերպ է եղել, քանի որ Գևորգ Մանուկյանն ինքը մի քանի անգամ զանգահարել է և անջատել հեռախոսը, իսկ հայրիկիս զանգը պատասխան զանգ է եղել»,- պարզաբանեց Գասպարյանը։

«Կարծում եմ՝ քաղաքապետի թեկնածուների քաղաքական ամբիցիանները սկսեցին արդեն իմ՝ պաշտոնակատար նշանակվելու օրվանից, քանի որ շատերն ունեին նպատակ քաղաքապետ դառնալու։ Կեղծ օգտատերերի միջոցով գրոհ էին սկսել ֆեյսբուքյան հարթակում, որովհետև «Ֆեյսբուքն» ուսումնասիրելով՝ տպավորություն էր ստեղծվում, թե ես քաղաքում չունեմ վարկանիշ, այնինչ ընտրություններն այլ պատկեր ցույց տվեցին։ Համոզված եմ՝ ֆեյսբուքյան պատկերը ստեղծում էին հակառակորդ թեկնածուների համակիրները, քանի որ միշտ կա պրոբլեմատիկ փոքրամասնություն, երբ ամեն թեկնածուի 5-10 համակիր շատ ակտիվ է լինում»,- շարունակեց Դիանա Գասպարյան։

Ինչ վերաբերում է տեսանյութին ու մեղադրանքներին, թե Դիանա Գասպարյանը նկարահանվել էր պոռնոգրաֆիկ բնույթի ֆիլմում, նա պարզաբանեց, թե արդեն իսկ հերքել է լուրերը։ Նրա խոսքով՝ տեսանյութում հնդիկ դերասանուհի է, և ամողջականը նայելու դեպքում ամեն ինչ հստակ կլինի։ Միևնույն ժամանակ նկատեց, որ տեսանյութը լռության օրն է հրապարակվել, ինչում նա միտում է տեսնում։