Հայաստանի հավաքականի մեկնարկային կազմում կային ֆուտբոլիստներ, որոնց չէի ցանկանա տեսնել. Արթուր Վանեցյան (տեսանյութ)
Ֆուտբոլի Հայաստանի հավաքականի նախախաղային մարզմանը Երևանի «Հանրապետական» ստադիոնում ներկա էր նաև ՀՖՖ նորընտիր նախագահ, ԱԱԾ տնօրեն Արթուր Վանեցյանը, որը լրագրողների հետ զրույցում նշեց, որ լիովին վստահում է ազգային թիմի նորանշանակ գլխավոր մարզիչ Արմեն Գյուլբուդաղյանցին:
«Նախորդ խաղից առաջ իմ մտքում ունեի թիմի հայտացուցակը և Հայաստանի հավաքականի մեկնարկային կազմում կային ֆուտբոլիստներ, որոնց չէի ցանկանա տեսնել: Անուններ չեմ նշի, բայց մենք ընտրել և նշանակել ենք գլխավոր մարզիչի և պետք է վստահենք նրան ու սպասենք արդյունքների: Եթե առաջիկայում արդյունքները չբավարարեն մեզ, կարող ենք փոխել մարզիչին, սակայն այս պահին այդպիսի խնդիր չկա, և ես լիովին վստահում եմ Արմեն Գյուլբուդաղյանցին, իրեն մաղթում եմ հաղթանակ:
Ֆուտբոլասերներին կոչ եմ անում երկրպագել մեր հավաքականին ու աջակցել թիմին: Չգիտեմ, թե հայերեն ինչպես է «դուխով» բառը, թող երկրպագուները դուխ տան թիմին և հավատան, որ մեր տղաները կարող են հավաքվել ու արդյունք ցուցադրել:
Շատ բացասական եմ գնահատում ՖԱՖ-ի և Red Eagles-ի երկրպագուների մասնակցությամբ միջադեպը: Այսօր ստեղծվել է մի իրավիճակ, որ այդ 2 շարժումները մշտապես բողոքել են ֆուտբոլի ֆեդերացիայից և ասել, որ իրենց չեն տրամադրում իրենց ուզած տեղերը: Նրանց հետ հանդիպումից հետո քննարկել ենք տարբեր հարցեր և մի խմբին առաջարկել եմ մի դարպասի հետևի տրիբունան, մյուս խմբին՝ մյուս: Սակայն նրանք շատ բացասական են ընդունել դա՝ նշելով, որ դարպասի հետևից իրենց ձայնը չի հասնում խաղադաշտ և չեն կարողանում երկրպագել նորմալ: Նրանք խոստացել էին, որ որևէ միջադեպ չի լինի, սակայն նրանք չեն պահել իրենց խոստումը: Չեմ ցանկանում այս պահին ասել, թե ով չի պահել խոստումը, սակայն դա բոլորին հայտնի է: Չեմ ցանկանում ինքս գնահատական տալ: Խաղից հետո ևս հանդիպել ենք ՖԱՖ-ի և Red Eagles-ի երկրպագուների հետ, և նրանք խոստացել են շտկել բոլոր տարաձայնությունները և այլևս տեղիք չտան նման երևույթների: Վաղվա խաղում ևս նրանք կլինեն իրար կողք, իսկ հետագայում, երբ կունենանք մարզադաշտի անվտանգության հայեցակարգը, որն այսօր չունենք, այդ ժամանակ հստակ կգրվի, թե որտեղ կլինեն այդ երկրպագուները:
Միջադեպի վերաբերյալ ՈւԵՖԱ-ից արձագանք կա, սակայն 100 հազար եվրո տուգանքի վերաբերյալ տեղեկությունը սխալ է: Կլինեն պատժամիջոցներ, որոնց մասին այժմ տեղեկություն չուեննք: Իհարկե, լինելու է: Ցանկացած արարք, որը կատարվում է խաղի ժամանակ, ՈւԵՖԱ-ի կողմից արժանանում է շատ խիստ գնահատականի: Բացի այն, որ այդտեղ հեղինակության ռիսկ կա ֆեդերացիայի համար, կարող են լինել նաև մեծ ֆինանսկական ծախսեր, իսկ մենք այժմ չենք կարող թույլ տալ այդպիսի ճոխություն»,- ասաց Արթուր Վանեցյանը: