Եթե դատավորների վրա ազդեցություն ունենայինք, լիքը մարդ այսօր ազատ արձակված չէին լինի. Արթուր Վանեցյան
Եթե մենք դատավորների վրա ազդեցություն ունենայինք եւ խառնվեինք դատական գործընթացին, հավատացեք՝ լիքը մարդ, որ այսօր ազատ են արձակվել, ազատ արձակված չէին լինի: Այս մասին այսօր՝ սեպտեմբերի 11-ին, հրավիրված մամուլի ասուլիսի ժամանակ հայտարարեց Ազգային անվտանգության ծառայության տնօրեն Արթուր Վանեցյանը:
«Ինչ վերաբերում է փակել, չփակելուն, դա եղել է մասնավոր զրույց, որտեղ հնչել են թե հայհոյանքներ, թե այլ լեքսիկոն է օգտագործվել: Բայց մյուս կողմից բոլորի համար պարզ է, որ դատավորների վրա փորձում են, եւ դա իրենց մոտ լավ ստացվում է, ազդեցություն ունենալ նախկին իշխանությունների ներկայացուցիչները»,- ասաց Արթուր Վանեցյանը:
Նշենք, որ ըստ հրապարակված ձայնագրության, Արթուր Վանեցյանը Հատուկ քննչական ծառայության պետ Սասուն Խաչատրյանին ասել է. Վանեցյան․ - «Ինձ դատավորը զանգեց, մի քիչ վախեցած ա, ասեցի մի հատ նայի սաղ գործը, Հրաչ, հա՞, Հրաչ ա անո՞ւնը։ ․․․ Մի խոսքով դատավորը, ով որ պտի կալանքը տա, ասեց մի հատ գործը նայեմ, պարոն Վանեցյան, զանգեմ զեկուցեմ, էս անեմ, էն անեմ, ․․․ ասի նայի, ասի նայի հիմքերը, կզանգես, կնայեմ, բայց կալանքը ուզես, չուզես պտի տաս»։