Ցույցերի ընթացքում բերման ենթարկվելիս բռնության ենթարկվելու գործով տուժող է ճանաչվել 25 անձ, այդ թվում՝ 5 լրագրող

Ապրիլի 27-ին մարմնական վնասվածքներով բժշկական կենտրոն դիմած Երեւանի բնակիչ Աշոտ Հովհաննիսյանը հայտարարել է, որ 20.04.2018թ.-ին Երեւան քաղաքի Կորյուն-Տերյան փողոցների խաչմերուկից բերման ենթարկվելու ժամանակ ծեծի է ենթարկվել ոստիկանների կողմից:

ՀՔԾ-ից հայտնում են, որ Ա. Հովհաննիսյանը հայտնել է նաեւ, որ իրեն բերման ենթարկած ոստիկաններից մեկն իր ավտոմեքենայից գաղտնի հափշտակել է 52.000 ՀՀ դրամ արժողությամբ երկու էլեկտրոնային կրիչ:

ՀՀ ոստիկանության աշխատակիցների կողմից բռնությամբ զուգորդված պաշտոնեական լիազորություններն անցնելու վերը նշված դեպքի առթիվ 07.05.2018թ.-ին ՀՀ ոստիկանությունում քրեական օրենսգրքի 309-րդ հոդվածի 2-րդ մասի հատկանիշներով հարուցվել է քրեական գործ, որն ընդունվել է ՀՀ հատուկ քննչական ծառայության քննիչի վարույթ:

Ի դեպ, նույն հոդվածի հատկանիշներով Հատուկ քննչական ծառայությունում հարուցվել, ինչպես նաեւ վարույթ են ընդունվել 50-ից ավելի առերեւույթ հանցագործությունների դեպքերի վերաբերյալ քրեական գործեր` 2018 թ.-ի ապրիլի 13-ից Երեւանում, ինչպես նաեւ հանրապետության մի շարք այլ քաղաքներում տեղի ունեցած հավաքների ընթացքում բերման ենթարկված քաղաքացիների հաղորդումների հիման վրա: Վերջիններս, մասնավորապես, հայտնել են, որ իրենց բերման ենթարկած ոստիկանները ծեծել եւ բռնություն են գործադրել իրենց նկատմամբ: Նաեւ հայտնել են, որ վնասվածքներ են ստացել ոստիկանների կողմից հատուկ միջոցների կիրառման հետեւանքով:

Վերը նշված բոլոր քրեական գործերը, փաստական հանգամանքներով պայմանավորված, միացվել են ոստիկանության պաշտոնատար անձանց նկատմամբ դեռեւս ապրիլի 22-ին ՀՀ հատուկ քննչական ծառայությունում ՀՀ քրեական օրենսգրքի 164-րդ հոդվածի 3-րդ, 308-րդ հոդվածի 1-ին եւ 309-րդ հոդվածի 2-րդ մասերով հարուցված քրեական գործին:

Նկատի ունենալով նշված քրեական գործի բարդությունն ու բազմադրվագ լինելը, ինչպես նաեւ բացահայտման ենթակա հանգամանքները, որոնց ուղղությամբ անհրաժեշտ է կատարել լայնածավալ եւ անհետաձգելի քննչական գործողություններ, ստեղծվել է քննչական խումբ:

Քրեական գործի շրջանակներում քննություն է կատարվում ՀՀ ոստիկանության եւ իրավապահ մարմինների այլ պաշտոնատար անձանց կողմից վերոհիշյալ դեպքերի ընթացքում բերման ենթարկված քաղաքացիների, այդ թվում` լրագրողների եւ փաստաբանների նկատմամբ բռնություն գործադրելու ավելի քան 60 դրվագով:

Մայիսի 16-ի դրությամբ հիշյալ քրեական գործի շրջանակներում արդեն տուժող է ճանաչվել 25 անձ, այդ թվում` 5 լրագրող եւ 1 փաստաբան:

Կատարվում է նախաքննություն:

ՀՀ հատուկ քննչական ծառայությունը միաժամանակ հայտարարում է, որ այն քաղաքացիները, ովքեր վերը նկարագրված դեպքերի օրերին տուժել են ՀՀ ոստիկանության աշխատակիցների անհամաչափ գործողությունների հետեւանքով, կարող են դիմել ՀՀ հատուկ քննչական ծառայություն: