Վրաստանից Հայաստան հրթիռ չի տեղափոխվել, ես դա ապացուցելու եմ դատավորին. Սամվել Բաբայան
Վերաքննիչ դատարանում այսօր շարունակվել է Լեռնային Ղարաբաղի պաշտպանության բանակի նախկին հրամանատար Սամվել Բաբայանի գործով վերաքննիչ բողոքի քննությունը: Սամվել Բաբայանը Հայաստան «Իգլա» տեսակի հրթիռային համակարգ տեղափոխելու և փողերի լվացման մեղադրանքով դատապարտվել է 6 տարի ազատազրկման։ Բաբայանն այսօր դատարանում ելույթ ունեցավ ր դարձյալ փորձեց փաստարկել, որ իրեն դատելու որոշումը պատվերի շրջանակում է և ինքը որևէ կապ չունի Հայաստան «Իգլա» տեսակի հրթիռի խողովակը տեղափոխելու գործի հետ։ Ասաց, որ նույն գործով դատապարտյալ Սանասար Գաբրիելյանն իր հետ միայն իրենից հետաքրքրվել է խողովակի պիտանելիության հարցով։
«Զենք-զինամթերքի մասով, եթե նայում եք ամբողջ ձայնագրությունը, ես իմացել եմ, որ իմ հետ գաղտնալսում է եղել մարտի 17-20-ին: Այսինքն 1,5 տարի էդ մարդիկ իրար հետ խոսում են, ինչ-որ հարցեր են քննարկում, ես չգիտեմ: Ես ասել եմ՝ բանավոր չեմ հասկանում, գնա նկարի, բեր տեսնեմ: Իմ որևէ ձայնագրությունից ես չեմ հրաժարվել: Նկարում բերում է, ես բացատրում եմ, որ սա «Իգլա»-ի հատված է, բայց քանի որ մարտկոցը բացակայում է, ապա կարելի է համարել տրուբա, գրական՝ խողովակ: Մարդը ինձ հարց է տալիս՝ կարող ա՞ բանակին դա պետք գա: Ես էլ ասում եմ՝ կարող ա, գուցե մի տեղ էլ էդ խողովակն է վնասված: Ես ասացի՝ եթե դա ձեռքդ բռնեն, պրոբլեմ ես ունենալու: Ասում եմ՝ դիր արկղի մեջ, տար էս ինչ տեղը դիր, ու մեր գյուղի անունն եմ տալիս, որովհետև դրանից ներքև էն գյուղն է, որտեղ ինքը ծանոթներ ունի: Ասել եմ՝ նկարի, նկարը տուր թևավորի (սպայի), թող գա վերցնի, տանի: Այդ ամբողջ խոսակցության մեջ առաջին անգամ ես արտահայտվում եմ, որ դա լինում է կոմպլեքս, երեք «վստրել» մի հատ «պուսկավոյ»: Այդ կոմպլեքս բառը երկու օր հետո, մարտի 20-ին, օգտագործում են Արմենը և ծախողը: Երբ նա ծախողին բացատրում է, որ մասնագետն ասում է, որ սա կոմպլեքս պետք է լինի: Ծախողն էնտեղից գոռգոռում է, թե մասնագետը չգիտի, ես հեսա գալու եմ Երևան և ապացուցելու եմ, որ դա տենց չի։ Այսինքն ես սրանով ասում եմ, որ երբ Սանասարին բացատրել եմ, որ դա կոմպլեքս չի: Իսկ հիմա կոնտեքստից ինչ-որ բառեր հանել, դա մեղադրանք չի դառնում: Կարաք մեղադրեք, օրենքն էլ եք դուք, դատարանն էլ, բայց եթե խոսում եք օրենքի դաշտից, ապա չունեք որևէ փաստ»,–մանրամասնել է Սամվել Բաբայանը:
Սամվել Բաբայանը պահանջեց հարցաքննել Վրաստանից Հայաստան զինամթերք տեղափոխելու մեջ մեղադրվող անձին, որը ազատության մեջ է։ «Երբ էն տղան, որին ավելի ծանր հանցագործության մեջ են մեղադրում, բերում եք դատարան, բայց պայմանով, որ նա հարցերի չի պատասխանում: Ես հարցնում եմ՝ եթե քեզ գումարը վճարեին, էլի՞ կհանձնեիր ԱԱԾ, ասում է՝ ոչ: Հիմա ուզում եմ հարցնել, ինչի՞ եք ձայնագրություններից էդ մասը հանել: Երրորդ, եթե այդ մարդն ավելի ծանր մեղադրանքով մեղադրվում է, բայց էսօր ազատության մեջ է, իսկ ես ավելի թեթև մեղադրանքով այստեղ նստած եմ, սա արդեն ամեն ինչի մասին խոսում է: Անձը նշում է, որ ինչ-որ անձ դա Վրաստանից հասցրել է Հայաստանի տարածք, ինքն էլ գնացել տնից վերցրել է: Հիմա ես հարգելի դատարան միջնորդում եմ, որ այդ մարդը որին Վրաստանից բերել են, որևէ կարգավիճակում հրավիրեք էստեղ հարց ուղղեք՝ էդ մարդը Վրաստանի տարածքից ինչ–որ զինամթերք տեղափոխել է Հայաստանի տարածք։ Եթե սա չեք անում, ուրեմն պատվերը հաստատում եք։ Ամբողջ հանրապետությունով մեկ թմբկահարվել է, որ այդ անձն է հրթիռը տեղափոխել Հայաստան Սամվել Բաբայանի կարգադրությամբ։ Հիմա բերեք հարց տանք էդ մարդուն տեղյա՞կ է հրթիռից, բերե՞լ է, թե՞ ոչ»,–հայտարարեց Սամվել Բաբայանը՝ կրկին պնդելով, որ Վրաստանից Հայաստան հրթիռ չի տեղափոխվել. «Ես դա ապացուցելու եմ մեղադրող դատավորին։ Ուզում եք դատեք՝ դատեք»։
Ինչ վերաբերում է փողերի լվացման մեղադրանքին, Սամվել Բաբայանը ասաց. «Ես մատնանշել եմ ումից եմ վերցրել գումարը, սկզբնաղբյուրը չեմ թաքցրել, եթե ռուսները էդքան էշ էին, ձեր չափ էլ չէին հասկանում որ կարելի է քրեական գործ բացահայտել, նրանք ասում են՝ ստեղ գործ չկա, ուղարկում են, դուք էլ էստեղ ութ ամիս անց գործ եք հարուցել։ «էդ գումարը ինձնից առգրավվել է 2016–ի սեպտեմբերին, իմ վրա քրեական գործ է հարուցվել 2017–ի ապրիլի 18–ին։ Մինչև էդ ինձ չեն կանչել փորձաքննության... ուզում եմ հասկանամ՝ էս ինչ դատաիրավական համակարգ ա, էս ձևով կարելի է լյուբոյին բռնեն քրեական գործ հարուցեն»,–ասաց Սամվել Բաբայանը։