Պարտքի հետ զուգահեռ պահուստներն էլ են աճել. ինչքանով են ավելացել նոյեմբեր ամսվա ընթացքում
«Ժողովուրդ» օրաթերթը գրում է. «Դեկտեմբերի 1-ի դրությամբ Հայաստանի պետական միջազգային պահուստները կազմել են 2 միլիարդ 174 միլիոն 400 հազար դոլար: «Ժողովուրդ» օրաթերթը ՀՀ Կենտրոնական բանկից տեղեկացավ նաև, որ նոյեմբեր ամսվա ընթացքում Հայաստանի միջազգային պահուստները ավելացել են 55 միլիոն 600 հազար դոլարով: Հիշեցնենք, որ նույն նոյեմբերի ընթացքում Հայաստանի պետական պարտքն ավելացել է 115 միլիոն դոլարով:
Ըստ այդմ, կարելի է ենթադրել, որ պետական պարտքի մի մասն ուղղվել է միջազգային պահուստների համալրմանը: Այլ կերպ ասած` նոյեմբերին ստացված վարկային միջոցները անհրաժեշտից ավել են եղել, և Հայաստանի կառավարությունը դրանց մի մասը ներդրել է միջազգային պահուստներ համալրելու համար, որպեսզի մեկ կամ երկու ամիս անց այդ միջոցները ուղղի պետական բյուջեի կարիքները հոգալու համար:
Սա նույնն է, թե մարդը բանկից վարկ վերցնի, բայց դրա մի մասի կարիքը չունենա և ցածր տոկոսով, որպես ավանդ, դնի բանկում՝ հաջորդ ամիս այն ծախսելու համար: Բնականաբար, արդյունքում տվյալ անձը տուժում է, բայց ողջ խնդիրն այն է, որ վարկը նրան մեծ դժվարությամբ է հաջողվել ստանալ, և նա չի կարող դրա մի մասից հրաժարվել, այնուհետև մեկ ամիս անց կրկին բանկից գումար խնդրել: Նա պարտադրված է գումարը վերցնել և բանկի տոկոսները վճարել՝ համոզված լինելու համար, որ հաջորդ ամիս ինքը խնդիրներ չի ունենա: ՀՀ կառավարությունը ներկայումս գտնվում է նույն վերը նկարագրված վիճակում»: