Ծննդկանի մահվան մեջ մեղադրվող բժշկի պաշտոնավարությունը ցանկանում են ժամանակավորապես դադարեցնել
Վանաձորի բժշկական կենտրոնում անցած տարվա հոկտեմբերին մահացած ծննդկան Հռիփսիմե Նազլուխանյանի գործով դատախազը միջնորդագիր է ներկայացրել ՀՀ առողջապահության նախարարին՝ առաջարկելով քննարկել այս գործով մեղադրյալ բժիշկ Դավիթ Շահվերդյանին մանկաբարձություն եւ գինեկոլոգիա տեսակի մասնագիտական գործունեություն իրականացնելու նպատակով տրված լիցենզիայի գործողության դադարեցման կամ կասեցման հարցը: Այս մասին այսօր՝ նոյեմբերի 24-ին, NEWS.am-ի հետ զրույցում ասաց ՀՀ գլխավոր դատախազի ԶԼՄ-ների հետ կապերի գծով խորհրդական Գոռ Աբրահամյանը:
ՀՀ քննչական կոմիտեի Լոռու մարզային քննչական վարչության պետի կողմից Լոռու մարզի դատախազությունում ստացվել է 32-ամյա ծննդկանի մահվան դեպքի առթիվ ՀՀ քննչական կոմիտեի Լոռու մարզային քննչական վարչությունում քննվող քրեական գործով որպես մեղադրյալ անցնող «Վանաձորի բժշկական կենտրոն» ՓԲ ընկերության ավագ մանկաբարձ-գինեկոլոգ Դավիթ Շահվերդյանի պաշտոնավարությունը ժամանակավոր դադարեցնելու մասին որոշումը, որն ուղարկվել էր ՀՀ քրեական դատավարության օրենսգրքի 152-րդ հոդվածի 1-ին մասի կարգով՝ դատախազի համաձայնությունը ստանալու նպատակով:
Նրա խոսքով, որոշման ուսումնասիրությունը ցույց է տվել, որ մեղադրյալ Դավիթ Շահվերդյանի պաշտոնավարությունը ժամանակավոր դադարեցնելու մասին դատախազի կողմից համաձայնություն տալու հիմքեր չկան:
Բանն այն է, որ ՀՀ քրեական դատավարության օրենսգրքի 152-րդ հոդվածի 1-ին մասի համաձայն` դատախազը, ինչպես նաեւ դատախազի համաձայնությամբ` քննիչն իրավունք ունի ժամանակավոր դադարեցնել հանրային ծառայության մեջ գտնվող կասկածյալի կամ մեղադրյալի պաշտոնավարությունը, եթե բավարար հիմքեր կան ենթադրելու, որ պաշտոնում մնալով նա կխոչընդոտի մինչդատական վարույթում կամ դատարանում գործի քննությանը, հանցագործությամբ պատճառված վնասի հատուցմանը կամ կզբաղվի հանցավոր գործունեությամբ:
Այսինքն, դատավարական հարկադրանքի նշված միջոցը ենթակա է կիրառման, եթե կասկածյալը կամ մեղադրյալը հանդիսանում է հանրային ծառայության մեջ գտնվող:
«Հանրային ծառայության մասին» ՀՀ օրենքի 3-րդ հոդվածի 1-ին կետի համաձայն` հանրային ծառայությունը պետությանը ՀՀ Սահմանադրությամբ եւ օրենքներով վերապահված լիազորությունների իրականացումն է, որն ընդգրկում է պետական ծառայությունը, համայնքային ծառայությունը, պետական եւ համայնքային պաշտոնները։ Պետական ծառայությունը մասնագիտական գործունեություն է, որն ուղղված է ՀՀ օրենսդրությամբ պետական եւ տեղական ինքնակառավարման մարմիններին վերապահված խնդիրների եւ գործառույթների իրականացմանը։
Նույն օրենքի 5-րդ հոդվածի 1-ին մասի 4-րդ կետի համաձայն՝ հանրային ծառայող է համարվում պետական եւ համայնքային ծառայության պաշտոնների անվանացանկով նախատեսված որեւէ պաշտոն զբաղեցնող կամ օրենքով սահմանված դեպքերում եւ կարգով հանրային ծառայության համապատասխան կադրերի ռեզերվում գտնվող անձը:
Այսինքն «Վանաձոր բժշկական կենտրոն» ՓԲ ընկերության մանկաբարձագինեկոլոգիական բաժանմունքի մանկաբարձ-գինեկոլոգը հանրային ծառայող չէ եւ չի իրականացնում հանրային ծառայություն:
Նկատի ունենալով վերը նշվածը՝ հանրային ծառայության մեջ չգտնվող մեղադրյալի նկատմամբ ՀՀ քրեական դատավարության օրենսգրքի 152-րդ հոդվածով նախատեսված հարկադրանքի միջոց կիրառելը անթույլատրելի է. հանրային ծառայության մեջ չգտնվող մեղադրյալ Դավիթ Շահվերդյանի նկատմամբ քրեադատավարական կարգով պաշտոնավարության ժամանակավոր դադարեցման կիրառման արդյունքում կարող են խախտվել ՀՀ Սահմանադրությամբ եւ ՀՀ աշխատանքային օրենսդրությամբ նախատեսված անձի աշխատանքի ազատ ընտրության, աշխատելու եւ դրա դիմաց համապատասխան վարձատրություն ստանալու իրավունքները:
Սակայն հաշվի առնելով, որ առկա է Դավիթ Շահվերդյանի, բժշկական կենտրոնում աշխատելով, հանցավոր գործունեությամբ զբաղվելու ողջամիտ հավանականություն՝ ՀՀ Լոռու մարզի դատախազ Արսեն Մարտիրոսյանը, ղեկավարվելով ՀՀ քրեական դատավարության օրենսգրքի 200-րդ հոդվածով, միջնորդագիր է ներկայացրել ՀՀ առողջապահության նախարարին՝ առաջարկելով քննարկել դեռեւս 1997թ. ՀՀ առողջապահության նախարարի կողմից բժիշկ Դավիթ Շահվերդյանին մանկաբարձություն եւ գինեկոլոգիա տեսակի մասնագիտական գործունեություն իրականացնելու նպատակով տրված լիցենզիայի գործողության դադարեցման կամ կասեցման հարցը:
ՀՀ «Լիցենզավորման մասին» օրենքի 37-րդ հոդվածի 1-ին մասի 3-րդ կետի համաձայն՝ լիցենզիայի գործողությունը կարող է դադարեցվել, եթե լիցենզավորման ենթակա գործունեության իրականացման հետեւանքով պատճառվել է ծանր վնաս, տվյալ դեպքում՝ մահ:
Առաջարկվել է նաեւ ձեռնարկել միջոցառումներ՝ «Վանաձորի բժշկական կենտրոն» ՓԲ ընկերությունում հետագայում նմանատիպ երեւույթները բացառելու ուղղությամբ: