Հայ օլիգարխների հոբբին...
Ըստ մամուլի հրապարակումներից մեկի, վարչապետ Կարեն Կարապետյանը նոր բիզնես է հիմնում: Արարատի սահմանամերձ Երասխ գյուղում նա 50 հեկտարի վրա պտղատու այգի է հիմնում: Կարեն Կարապետյանն առաջին պաշտոնյան չէ, որ մեծ հողակտորներ է ձեռք բերում ու այգի հիմնում:
Lurer.com-ի փոխանցմամբ Կարապետյանի նախորդը ևս հողագործությամբ միլիոններ էր վաստակել: Մարդիկ կարող են կարծել, որ սա լավ է ու գյուղատնտեսությունը կզարգանա, սակայն իրականության մեջ այս պրոցեսը վատ ավանդույթի մասին է խոսում:
Պետությունն անում է ամեն բան, որպեսզի գյուղացին չկարողանա իր հողը մշակել և եկամուտ ստանալ: Գյուղացիները ստիպված հրաժարվում են հող մշակելուց և այն վաճառում են մեծահարուստներին, իսկ իրենք դառնում են վարձու աշխատող այդ հողատերերի մոտ: Կարեն Կարապետյանը, Հայաստանի մյուս խոշոր հողատեր պաշտոնյաներն ու բիզնեսմենները ավատատիրական նոր ժամանակաշրջան են բերում մեր երկիր: Գյուղատնտեսական նշանակության հողատարծքներն այսօր լավագույնս մշակում են Հայաստանի օլիգարխները: Նախկին վարչապետ, դոլարային միլիոնատեր Հովիկ Աբրահամյանն, օրինակ, պոմիդոր աճեցնելով է հարստացել, երբ գյուղացիները վարկերի պատճառով զրկվում էին իրենց տներից եւ այլ ունեցվածքից: Հիմա էլ կառավարությունն այնպիսի պայմաններ է ստեղծում, որ գյուղացին կամավոր հրաժարվի իր հողատարածքից՝ հօգուտ օլիգարխների ամենասիրած հոբբիի և բիզնեսի: Օրինակ, հենց Կարեն Կարապետյանի կառավարությունն էր, որ փոփոխություններ մտցրեց Հողային օրենսգրքի մեջ: Այս փոփոխություններով Հայաստանում գյուղատնտեսական նշանակության հողատարածք ունեցող, բայց ՀՀ քաղաքացիությունը կորցրած անձանց հողատարածքներն աճուրդով օտարելու են: Դժվար չէ ենթադրել, որ այս հողատարածքները բաժին են հասնելու հենց հայ օլիգարխներին, ինչն էլ կարող է հանգեցնել դասական ֆեոդալական կարգերի հաստատման: