ԵՏՄ-ն չլիներ՝ այդքան «խիյար-պամիդոր» չէինք արտահանի. Վահրամ Բաղդասարյան

ԱԺ-ում ԵՏՄ հարցով ժամանակավոր հանձնաժողով ստեղծելու հարցի քննարկման ժամանակ ՀՀԿ խմբակցության ղեկավար Վահրամ Բաղդասարյանը ասաց, որ այնպիսի տպավորություն է, որ ԵԼՔ խմբակցությունում մի մասը շատ հստակ ասում է, որ պետք է ԵՏՄ-ից դուրս գալ, իսկ մյուս մասը դեմ է դրան:

«Եվ որպեսզի այդ հակասությունը դուրս չգա խմբակցությունից, դեմ լինողներն ասում են՝ տղերք եկեք ստեղծենք հանձնաժողով, մի հատ ուսումնասիրենք՝ արժե, թե չարժե: Հիմա ես ձեզ եմ դիմում՝ կողմնորոշվեք, արժե, թե չարժե: Մեր քաղաքական թիմի դիրքորոշումներում որևէ փոփոխություն չկա, մենք պետք է մեր համագործակցությունը շարունակենք ԵՏՄ, ինչպես նաև Եվրամիության ու այլ երկրների հետ»,- նշեց նա:

Բաղդասարյանն ասաց, որ ուզում է մեջբերել տնտեսական պաշտոնական ցուցանիշները:
«2016 թվականի դրությամբ իրական ՀՆԱ-ն 2014 թվականի նկատմամբ գրանցել է 3.4 տոկոս աճ: Նույն ժամանակահատվածում մեկ շնչին բաժին ընկնող ՀՆԱ-ն աճել է 8.7 տոկոս: 2017 թվականի հունվար-հունիսին, 2014 թվականի հունվար-հունիսի համեմատ իրական ՀՆԱ-ի աճը կազմել է 14.1 տոկոս: Սակայն վերցնենք ձեր կողմից առաջադրված մեթոդաբանությունը և համեմատենք 2014-2016 թվականների դոլարային արտահայտությամբ ՀՆԱ-ի ցուցանիշները: Իսկապես, համաձայն ԱՄՀ տվյալների՝ դոլարային ատահայտությամբ ՀՆԱ-ն նվազել է 9 տոկոսով: Համեմատենք այս ցուցանիշնները համադրելի երկրների հետ: Վրաստանում նույն ցուցանիշը տվյալ ժամանակահատվածում նվազել է 14 տոկոսով, Մոլդովայում՝ 16, Ուկրաինայում՝ 22 տոկոսով: Խնդիրը կայանում նրանում, որ ԱՄՆ դոլարն արժևորվել է»,- ասաց Վահրամ Բաղդասարյանը:

Նա ասաց, որ ԵՏՄ-ին անցամակցելուց հետո դեպի ԵՏՄ երկրներ արտահանվող ապրանքների ծավալների զգալի աճ է գրանցվել, մեծ աշխատանք է տարվել հայկական ապրանքների արտահանման ուղղությամբ: ԵՏՄ-ին անդամակցությունը, նրա խոսքով, չի խոչընդոտել նաև ապրանքների արտահանմանը դեպի ԵՄ և այլ երկրներ: Այդ ուղղություններով ևս աճ է եղել:

«2013 թվականին մենք արտահանել ենք 64 հազար տոննա գյուղմթերք, 2016-ին՝ 146 հազար տոննա: Դա կրկնակիից ավելի է, դրա 90 տոկոսն արտահանվել է ԵՏՄ երկրներ: Եվ այստեղ միայն ծիրանը օրինակ բերելով՝ պետք է նկատի ունենաք նաև եղանակային անբարենպաստ պայմանները», նշեց նա: